Úndistanda koronavırýstyń «Delta plıýs» shtamy úreı týǵyzyp otyr

NUR-SULTAN. QazAqparat – AQSh-tyń Djons Hopkıns ýnıversıtetiniń málimetteri boıynsha, pandemııa kezinde 180 mıllıonnan astam adam koronavırýspen aýyryp, 3,9 mıllıonnan astamy qaıtys boldy. 2,7 mıllıardtan astam adam vaktsına aldy, dep habarlaıdy QazAqparat VVS-ge silteme jasap.

Ulybrıtanııa Eýropany basyp ozdy

Ulybrıtanııa Eýropada koronavırýs indeti boıynsha birinshi orynǵa shyqty. Beısenbide Ulybrıtanııada Covid-19-dyń 16 myńnan astam jaǵdaıy anyqtaldy (ótken aptada shamamen 11 myń).

Salystyrý úshin, Frantsııada sol kúni aýrýdyń 2 myń jaǵdaıy tirkeldi, Germanııada – 654. Osy aptada Ulybrıtanııada indettiń «Delta» nusqasymen syrqattanýshylyq eki ese artty.

Izraıl qaıta maska kıe bastady

Izraıl Covid-19 ahýalyna baılanysty maska rejımine qaıta kóshti. Bul – jergilikti bıliktiń «Delta» koronavırýs shtamynyń taralýyn boldyrmaý maqsatynda qolǵa alǵan shara.

«Delta plıýs» koronavırýsy ákelgen úreı

Koronavırýstyń ekinshi tolqynynan keıin Úndistan shekteýlerdi birtindep alyp tastaıdy. Alaıda sarapshylar Covid-19 úshinshi tolqynyna daıyndalý kerektigin aıtyp otyr. Úndistanda tabylǵan «Delta plıýs» koronavırýsynyń jańa nusqasy qazirgi vaktsınalardyń áserin álsiretýi múmkin degen qaýip bar.

«Delta plıýs» – «Delta» koronavırýs nusqasynyń bir túri. Dál osy túri Covid-19-dyń ekinshi tolqynyna sebep boldy. Úndistan úkimeti «Delta plıýs» nusqasyna qatysty alańdaýshylyq bildirdi. Eger vırýs álsiz adamdar arasynda tarala berse, bolashaqta mundaı nusqalar kóbirek paıda bolýy múmkin, deıdi sarapshylar.

Alaıda qazir jańa nusqadan koronavırýstyń úshinshi tolqyny paıda bolatynyn naqty boljaý múmkin emes. Sarapshylar aldaǵy birneshe aptada bári ózgerýi múmkin ekenin aıtady.

Sıdneıdiń keıbir aýdandarynda, sonyń ishinde Bondı-bıch Covid-19 ınfektsııasynyń artýyna baılanysty kezekti ret lokdaýn engizdi. Jańa shekteýler qala ortalyǵy men qala mańyna taralady. Osylaısha, Avstralııa bıligi «Deltanyń» ólimge ákeletin nusqasynyń taralýyn boldyrmaýǵa tyrysýda. Avstralııada juma kúni koronavırýs ınfektsııasynyń 16 jaǵdaıy tirkeldi. Bul – jeltoqsan aıynyń basynan bastap Sıdneıdegi alǵashqy lokdaýn.

Brıtandyq olımpıada quramasynyń bir bóligi Tokıodaǵy oıyndardyń aldynda vaktsına alǵysy kelmeıdi. Bul týraly Brıtan Olımpıada qaýymdastyǵynyń basshysy Endı Anson málimdedi. Komıtet basshysy oıyndardyń bastalýyna deıin brıtan sportshylarynyń 90% astamy koronavırýsqa qarsy vaktsına alatynyn, biraq ulttyq quramanyń keıbir músheleri vaktsınaǵa qarsy ekenin aıtty.