Úndistanda koronavırýstan ólim-jitim kórsetkishi rekord ornatýda
Bir kún buryn Úndistanda koronavırýs indetin juqtyrýdyń jańadan 400 myńnan astam jaǵdaıy anyqtaldy. Bir táýliktik mundaı kórsetkish ózge eshbir elde tirkelgen joq.
Syrqattanýdyń kúrt artýyna eldiń densaýlyq saqtaý júıesi daıyn bolmaı shyqty. Aýrýhanalar statsıonarlyq emdi qajet etetin barlyq naýqasty qabyldaı almaı jatyr. Sondaı-aq elde medıtsınalyq ottegi tapshylyǵy bar.
Úndistanda qazir ne bolyp jatyr?
Pandemııa bastalǵaly Úndistanda koronavırýstyń 19 mıllıonnan astam oqıǵasy tirkeldi. Bul kórsetkishpen AQSh-tan keıin álemde ekinshi orynda tur. Іndetten 215 myń adam qaıtys bolǵany zerthanalyq rastaldy. Degenmen, sarapshylardyń paıymynsha, testilerdiń jetispeýshiliginen shynaıy kórsetkish resmı málimetterden alshaq jáne joǵary bolýy yqtımal.
Sarapshylardyń aıtýynsha, kóptegen adamnyń, ásirese aýyl turǵyndarynyń medıtsınalyq kómekke júginýge múmkindigi joq jáne olar úılerinde emdelýde. Sondaı-aq mamandardyń sózine qaraǵanda, aýyldar men shaǵyn qalalarda koronavırýstan bolyp jatqan ólim-jitim resmı derekterge enbeı qalyp jatyr.
Úndistanda vaktsınatsııa qarqyny qandaı?
Teorııa júzinde Úndistannyń árbir eresek turǵyny vaktsınatsııadan óte alady. Alaıda, ótken senbi kúni bastaý alǵan egý kampanııasyna bastalmaı jatyp toqtaý qaýpi týyndady: birneshe shtat 18-44 jas aralyǵyndaǵy halyqty egý úshin vaktsınanyń qajetti dozasy jetkiliksiz ekendigin málimdedi.
Úndistan terrıtorııasynda koronavırýsqa qarsy oılap tabylǵan barlyq vaktsınanyń kóp bóligi óndirilip jatqanyna qaramastan, elde egý kampanııasyn shuǵyl uıymdastyrýǵa dozalardyń qajetti kólemi joq. Osyǵan oraı Úndistan AstraZeneca vaktsınasyn eksporttaýdy ýaqytsha toqtatty.
Eldiń Densaýlyq saqtaý mınıstrliginiń málimetinshe, 2 mamyrǵa deıin vaktsınanyń 1-komponentin nebári 84 599 adam alǵan.
Úndistan eki vaktsınany qoldanýda – Oksfordtyń AstraZeneca (Úndistan ony Covishield dep ataıdy) jáne Úndistannyń Bharat Biotech kompanııasy óndirgen – Covaxin. Reseıdiń Sputnik V vaktsınasy da maquldaý aldy. Sputnik V preparatynyń alǵashqy 150 myń dozasy ótken senbide elge jetkizildi.
Úndistanǵa kómektesý úshin ózge elderdiń áreketi qandaı?
Kóptegen elder Úndistanǵa kómegin joldady jáne áli de jiberip jatyr. 29 sáýirdegi málimetken sáıkes, dári-dármek pen medıtsınalyq tehnıka jibergen elder sany 40-qa jýyq boldy.
AQSh-tan birneshe ushaq keldi. Olar medıtsınalyq ottegi, gıgıenalyq maskalar jáne koronavırýsqa ekspress-tester jóneltken.
Senbi kúni Germanııanyń áskerı-kóliktik ushaǵy Úndistanǵa ókpeni jasandy jeldetýge arnalǵan 120 apparat alyp keldi. Ulybrıtanııa da túrli medıtsınalyq quraldar jibergen.
Úndistan nelikten lokdaýn engizbeıdi?
Úndistan bıligi eldiń bútin aýmaǵynda qatań lokdaýn engizýdi sońǵy shara retinde qarastyryp otyr. El Úkimeti ekonomıkalyq ahýal odan ári ýshyǵyp ketetinine qaýiptenedi. Ótken jyly sáýir-maýsym aralyǵynda karantındik shekteýlerdiń engizilýinen eldiń Jalpy ishki ónimi 2019 jyldyń osyndaı kezeńimen salystyrǵanda 24% tómendep ketken.
Degenmen, eldiń jekelegen óńirinde qatań karantındik sharalar engizilgen. Máselen, Delıde, Maharashtra, Karnataka, Batys Bengalııa jáne Odısha shtattarynda.
Birqatar óńirde, sonyń ishinde halyq kóp qonystanǵan Ýttar-Pradesh shtatynda konmendanttyq saǵat jáne demalys kúnderi lokdaýn bar.
Indian Express gazetiniń jazýynsha, koronavırýs pandemııasymen kúres jónindegi jumys toby indetti aýyzdyqtaý úshin jalpyulttyq lokdaýn engizýdi usynyp otyr.