Úndistanda birneshe poıyz soqtyǵysyp, 288 adam qaza tapty

ASTANA. QazAqparat – Úndistannyń shyǵysyndaǵy Odısha shtatynda birneshe poıyzdyń soqtyǵysýy saldarynan qaza tapqandar sany 288 adamǵa deıin ósti. 900 adam túrli jaraqat aldy. Bul týraly QazAqparat BBC News agenttigine silteme jasap habarlaıdy.

«Shalımar-Koromandel» júrdek poıyzy jergilikti ýaqyt boıynsha saǵat 19:00 shamasynda relsten shyqty, bul rette onyń birneshe vagony «Esvantpýr-Haora» ekspresi júretin basqa jolǵa túsip ketti. Qarsy baǵytta júrip kele jatqan poıyz áýeli osy vagondarmen, sodan keıin jolda turǵan taǵy bir júk poıyzymen soqtyǵysty.

Bul - Úndistanda 1980 jyldardan bergi eń úlken temirjol apaty. Jergilikti bıliktiń baǵalaýynsha, qurban bolǵandardyń sany artýy múmkin.

Apat bolǵan jerge 200-den astam jedel járdem kóligi kelip jetti, kezekshilikke qosymsha 100-den astam dáriger jumyldyrylǵan.

Kýágerlerdiń aıtýynsha, tiri qalǵan jolaýshylardyń kópshiligi aýdarylǵan vagondarda qalǵan adamdarǵa kómekke kelgen. Qutqarý jumystary jalǵasýda.

Úndistan Premer-Mınıstri Narendra Modı qaza tapqandar men zardap shekkenderdiń týystaryna kóńil aıtyp, apat bolǵan jerde qutqarý jumystary júrgizilip jatqanyn jáne zardap shekkender qajetti kómek alý úshin qoldan kelgenniń bári jasalyp jatqanyn habarlady.

Úndistandaǵy eń úlken temirjol apaty 1981 jyly Bıhar shtatyndaǵy tsıklon kezinde bolǵan. Ol kezde jolaýshylarǵa lyq toly poıyz ózenge qulap, kem degende 800 adam kóz jumǵan.