Úndistan premer-mınıstri Tvıtterge qazaqsha jazdy

ASTANA. QazAqparat - Qazaqstanǵa memlekettik is-saparmen kelgen Úndistan premer-mınıstri Narendra Modı Tvıtterde qazaqsha jazdy. Birinshi Tvıtti ol Astanaǵa qonǵan kezde birden jazǵan.

«Úndistannyń Ortalyq Azııadaǵy senimdi dosy - Qazaqstanǵa kelgenime óte qýanyshtymyn», - dep jazdy ol.

Ekinshi tvıtte ol Qazaqstan Premer-Mınıstri Kárim Másimovpen birge túsken fotosýret salǵan bolatyn.

Narendra Modı onda: «Premer-Mınıstr Kárim Másimov, ystyq yqylaspen qarsy alǵanyńyzǵa alǵysymdy bildiremin», - degen jazý qaldyrǵan.

Aıta keteıik, onyń oqyrmandary 13,5 mıllıonǵa jetip otyr.

Keshe Astanada Qazaqstan Premer-Mınıstri Kárim Másimov pen elimizge resmı saparmen kelgen Úndistannyń Úkimet basshysy Narendra Modıdiń qatysýymen Qazaqstan-Úndistan bıznes-forýmy ótti. Bıznes-forým barysynda Qazaqstan men Úndistannyń saýda-ekonomıkalyq, ınvestıtsııalyq qarym-qatynastarynyń jol kartasy jasaldy. Oǵan jalpy 30-ǵa tarta birlesken joba enip otyr. Sonymen qatar, Qazaqstan men Úndistan kásipkerleri men iri kompanııalary arasynda 12 kelisimshartqa qol qoıyldy.