Úndistan men Pákistan úshin ashyq dıalog daǵdarystan shyǵýdyń jalǵyz qolaıly joly - QR SІM

ASTANA. QazAqparat - QR SІM Úndistan men Pákistan arasyndaǵy áskerı-saıası jaǵdaıdyń shıelenisýine baılanysty málimdeme jasady, dep habarlaıdy QazAqparat QR SІM baspasóz qyzmetine silteme jasap.

«Qazaqstan Úndistan men Pákistan arasyndaǵy áskerı-saıası jaǵdaıǵa baılanysty alańdaýshylyq bildiredi.

Qazaqstan eki el arasyndaǵy ashyq jáne konstrýktıvti saıası-dıplomatııalyq dıalog qazirgi daǵdarystan shyǵýdyń jalǵyz tıimdi jáne qolaıly joly dep sanaıdy.

Qazaqstan taraptardy, eń aldymen, ahýaldyń odan ári ýshyǵýyn aldyn alý úshin aımaqtyq jáne jahandyq qaýipsizdiktiń negizgi múddelerine negizdelgen barynsha sabyrlylyq pen halyqaralyq quqyq normalaryn saqtaýǵa shaqyrady», - delingen málimdemede.


Eske sala ketsek, Pákistan Respýblıkasy áýe keńistiginiń búkil halyqaralyq áýe saparlaryna jabyqtyǵy sebepti «Eır Astana» áýe kompanııasynyń Delı - Almaty baǵytyndaǵy 27 aqpanǵa josparlanǵan reısi keıinge qaldyrylǵan bolatyn.