Úndistan klımat jónindegi Parıj kelisimin maquldady

ASTANA. QazAqparat - Úndistan jeksenbide resmı túrde Klımat jónindegi Parıj kelisimin ratıfıkatsııalady. Úndistan kelisimdi qoldaǵan soń qujatty maquldaǵan parnık gaz shyǵaryndylaryna jaýapty elder úlesi 52%-ǵa jetti. Kelisim bul úles 55%-ǵa jetkende kúshine enedi. Aldaǵy aptada ony Eýroodaq maquldaýy múmkin, dep habarlaıdy newsru.com.

Úndistan bıliginiń ókilderi Nıý-Delı kelisimdi maquldaǵanyn Nıý-Iorktegi BUU hatshylyǵyna resmı málim etti. Al halyqaralyq uıymnyń bas hatshysy Pan Gı Mýn Úndistandy osy qadamymen quttyqtady.

BUU Bas hatshylyǵy keńsesiniń habarlaýyna sensek, Úndistandy qosqanda kelisimge 62 memleket qosylǵan.

Parıj kelisimi 2015 jyly 12 jeltoqsanda BUU-nyń klımattyń ózgerýi jónindegi máseleler boıynsha búkilálemdik konferentsııasynda (COP-21) Frantsııa astanasynda qabyldanǵan.  Forýmnyń 195 qatysýshysy 2100 jylǵa deıin Jerdegi ortasha temperatýranyń ósýin Tselsıı boıynsha 2 gradýstan arttyrýǵa jol bermeýge ýaǵdalasty. 
Eske sala ketsek, Qazaqstan Parıj klımattyq kelisimine qosylý rásimin aıaqtap keledi. 2016 jyldyń 4 shildesinde Astanada ótken QR Prezıdenti janyndaǵy «Jasyl ekonomıkaǵa» kóshý jónindegi keńestiń tórtinshi otyrysynda energetıka mınıstri Qanat Bozymbaev osylaı málim etti.

Mınıstrdiń aıtýynsha, Parıj klımattyq kelisimin iske asyrý Qazaqstan úshin mańyzdy mindetterdiń biri. «Parıj kelisimi bazasynda «jasyl ekonomıkaǵa» kóshý jol kartasyn ázirlep, tabıǵı resýrstardy tıimdi paıdalaný máseleleri júktelgen bolatyn. Energetıka mınıstrligi Parıj klımattyq kelisimine qosylýǵa baǵyttalǵan júıeli jumystar men «jasyl ekonomıkaǵa» kóshý tujyrymdasyn júzege asyryp keledi. Byltyrǵy jyldyń qyrkúıeginde ótken Keńes otyrysynda parnıktik gazdardy 90-jyldardyń deńgeıine qaraǵanda 2030 jylǵa qaraı sózsiz maqsat retinde 15 paıyz, shartty maqsat retinde 25 paıyzǵa erikti túrde tómendetý týraly sheshim qabyldandy», - dedi Q. Bozymbaev.