Úndistan qazaqstandyq «Ál-Farabı-1» jer serigin ushyrdy

ASTANA. QazAqparat - 15 aqpan kúni saǵat 09.28-de Úndistan ǵarysh zertteý uıymy (ISRO) 103 spýtnıkpen qosa, Ál-Farabı atyndaǵy Qazaq ulttyq ýnıversıteti sońǵy tehnologııa úlgisimen jasaǵan salmaǵy 1,7 kelilik nanospýtnıkti ushyrdy, dep habarlady Úndistan elshiliginde.

104 spýtnık zymyran tasyǵysh kómegimen Shrıharıkota aralynda ornalasqan Satısh Dhvan atyndaǵy ǵarysh ortalyǵynan orbıtaǵa (PSLV-C37) ushyryldy. ISRO atalmysh qurylǵyny ushyrǵannan keıin, bir ýaqytta eń kóp jerserikti ushyrý boıynsha álemdik rekord ornatty.

Úndistannyń 714 kelilik «Cartosat-2» serigi ushyrylymnyń negizgi spýtnıgi atandy. Bir mezette ushyrylǵan 103 spýtnıktiń tek ekeýi Úndistanǵa tıesili. Qalǵany Izraıl (1), Qazaqstan (1), Nıderlandy (1), Shveıtsarııa (1), Birikken Arab Ámirlikteri (1) jáne Amerıka Qurama shtattary (96) sekildi elderdiń serikteri bolyp tabylady.

PSLV-C37 bortyna tıelgen 104 spýtnıktiń jalpy salmaǵy 1 378 kelini quraıdy. Apparattar 16 mınýt 48 sekýnd boıy ushqannan keıin orbıtaǵa jetken. Keıingi 12 mınýtta barlyq 104 qurylǵy jeke jeke bólinip shyqty. 

Úndistan men Qazaqstan ǵarysh qyzmeti salasyndaǵy seriktestik týraly memorandýmǵa 2009 jyldyń qańtar aıynda qol qoıǵan.