Úndistan bıyl halyq sany boıynsha Qytaıdy basyp ozady

DELI. QazAqparat - Aldaǵy aılarda Úndistan halyq sany boıynsha Qytaıdy basyp ozyp, álemdegi halqy eń kóp elge aınalady, dep habarlaıdy QazAqparat VVS aqparat agenttigine silteme jasap.

Sońǵy 70 jylda Qytaı men Úndistan halqy álemdegi jan sanynyń úshten birinen astamyn qurady.
Uıymnyń boljamynsha, Úndistan halqy jaqyn arada 1,4286 mlrd adamǵa jetýi kerek, bul 1,4257 mlrd halqy bar Qytaıdan 2,9 mln-ǵa kóp.
BUU seısenbide álemdegi demografııalyq betalystardyń ózgerýine kózqaras týraly baıandamany jarııalady.
Qytaıda týý kórsetkishi tómendep, byltyr halyq sany 1961 jyldan beri alǵash ret azaıa bastady. Demograftar muny elde 35 jyl boıy júrip, jeti jyl buryn toqtap qalǵan bir bala saıasatymen, bala baǵýǵa jumsalatyn shyǵynnyń joǵary bolýymen baılanystyryp otyr.
Úndistanda bir áıelge shaqqandaǵy týýdyń ortasha sany da jyldan jylǵa azaıyp keledi.
Bul rette baıandamada Úndistan halqynyń sany týraly málimetter boljamdy bolyp tabylady, óıtkeni elde sońǵy halyq sanaǵy 2011 jyly júrgizilgen.
Sońǵy 140 jyl ishinde Úndistan halqynyń sany ár 10 jyl saıyn júıeli túrde eseptelip keldi, biraq 2021 jyly koronavırýs pandemııasyna baılanysty halyq sanaǵy toqtatyldy. Endi ol 2024 jylǵa josparlanǵan.
Qarasha aıynda álem halqynyń sany 8 mlrd adamǵa jetti. Degenmen, sarapshylar onyń ósý qarqyny báseńdep, qazir 1950 jyldan bergi eń tómengi deńgeıge jetkenin aıtady.
Úndistanda da, Qytaıda da týý kórsetkishi tómendeýde.
Qytaıda 2016 jyly bılik bir bala saıasatyn joıyp, jas otbasylardy eki nemese odan da kóp balaly bolýǵa kóndirýge baǵyttalǵan birneshe bastamalardy usynǵanymen, halyq sany azaıyp keledi.
Úndistanda da týý kórsetkishi sońǵy onjyldyqtarda aıtarlyqtaı tómendedi. Bul rette halyqtyń ósimi jylyna 1,2% deńgeıinde qalyp otyr, bul ótken onjyldyqpen salystyrǵanda shamamen tórtten birine tómen.
BUU Halyqty ornalastyrý qorynyń tapsyrysy boıynsha júrgizilgen zertteý Úndistandaǵy halyq sanynyń ósimi úreı týdyratynyn kórsetti. Úndilerdiń kópshiligi halyqty tym kóp jáne týý kórsetkishin tym joǵary dep atady.
Saýalnamaǵa qatysqandardyń úshten ekisine jýyǵy halyq sanynyń ósýi elde ekonomıkalyq qıynshylyqtar týǵyzyp otyrǵanyn aıtty.
Biraq BUU ókilderi úndister halyq sanynyń ósýine alańdamaýy kerek dep sanaıdy. «Halyq sany úreı týdyrmaýy kerek. Kerisinshe, adamdardyń jeke tańdaý quqyǵy saqtalsa, bul sandar progrestiń, damýdyń jáne ambıtsııanyń ósýiniń sımvoly retinde qarastyrylýy kerek», - dedi BUU-nyń Úndistandaǵy ókili Andrea Voınar.