Úndistan ataýy Bharat dep ózgertiletini ras pa

ASTANA. QazAqparat – Úndistan demalys kúnderi G20 sammıtin qabyldap jatyr, keshe qonaqtarǵa «Bharat prezıdentiniń» atynan keshki asqa shaqyrý jiberilgen, dep habarlaıdy QazAqparat VVS-ge silteme jasap.

«Bharat» ataýyn el turǵyndary halyqtyń basym bóligi sóıleıtin resmı hındı tilinde Úndistandy bildirý úshin paıdalanady. Bul sóz 1949 jyly qabyldanǵan el Konstıtýtsııasynda da bir ret kezdesedi. «Úndistan, ıaǵnı Bharat shtattar odaǵy bolady», - delingen. Degenmen, aǵylshyn tilindegi resmı qujattarda únemi «Úndistan» sózi qoldanylady. Endi Narendra Modı úkimeti ejelgi tájirıbeni ózgertýdi sheship, 9 qyrkúıekte G20 sammıtiniń qatysýshylaryn «Bharat prezıdentiniń» atynan keshki asqa shaqyrǵan tárizdi.

ASEAN-Úndistan sammıtine arnalǵan baspasóz habarynda Naredra Modıdiń ózin «Bharat premer-mınıstri» dep ataǵan.Ataýyn resmı ózgertýge keler bolsaq, Úndistan parlamenti bul máseleni 18 qyrkúıekte qaraı alady. Modı úkimeti 18-22 qyrkúıek arnaıy parlament sessııasyn shaqyrdy. Oppozııalyq saıasatkerler men pikir bildirýshiler bul sessııada el ataýyn ózgertý máselesi talqylanady dep boljap otyr. Bul – Úlken Bharat kartasy bar parlamenttiń jańa ǵımaratynda ótetin alǵashqy sessııa bolmaq. Bul kartaǵa kórshiles elderdiń, ıaǵnı Aýǵanstannyń bir bóligi, Pákistan, Nepal, Bangladesh, Shrı-Lanka men Mıanma aýmaǵy tolyqtaı engen. Úndistan kórshileri osyǵan baılanysty resmı narazylyq bildirdi.