Úndeme, tynysh otyr: Balanyń talabyn shekteıtin tyıym sózderdiń tizimi jasaldy

ASTANA. QazAqparat – «Jańa adamdar» qozǵalysy psıholog Zarına Kenjeqarmen birge balanyń talabyna tusaý salyp, qııalyn shekteıtin tyıym sózderdiń tizimin jasady, dep habarlaıdy QazAqparat tilshisi.

Ózderin «Jańa Qazaqstannyń» jarshysy retinde tanystyryp júrgen «Jańa adamdar» qozǵalysy psıholog mamannyń kómegimen qoǵamdaǵy balanyń damýyna kedergi keltiretin tyıym sózderdi anyqtap, neırojeliniń kómegimen ol sózderden keletin zııandy shartty ıllıýstratsııalar arqyly keskindep shyqqan.

«Tıme, syndyrasyń!», «Birinshi ruqsat suraý kerek», «Ákel, ózim isteıin», «Qýmashy», «Tynysh otyr»...

Psıholog Zarına Kenjeqardyń paıymynsha, ottyń basy, oshaqtyń qasynda jıi aıtylatyn osy sózder balanyń sanasy men minez-qulqynda óshpes iz qaldyryp jatyr.

Bul sózderdi estip ósken bala úlken ómirge aıaq basqanda bireý kelip ıtermelemese, óz qalaýymen is bastamaıtyn, ár qadamyn aınalasyna alańdap basatyn, qolynan kelip turǵan istiń ózin senimsizdikpen oryndaıtyn eriksiz adam bolyp ósýi múmkin.

Al ıllıýstratsııalar «Osy sózderdi álemge bilimi men eńbeginiń arqasynda teńdessiz jetistikke jetken adamdar estip ósse, ne bolar edi» degen suraqqa jaýap izdeıdi.

Qoǵalys belsendisi Alpamys Ábilov qoǵamdaǵy keleńsiz qubylystardyń tamyryn joıý úshin jurt bolyp zııandy tyıym sózderden arylý qajet dep esepteıdi.

«Bizge ári qaraı da basqalardyń pikirine jaltaqtap, ár áreketimizden uıalyp ómir súre berýge bolady. Bireýdiń bastamasy men tyń ıdeıasyn baıybyna barmaı jatyp synaý, ózimizdiń istep júrgen sharýamyzǵa kúmánmen qaraý sııaqty jat ádetterden arylýymyz kerek. Ol úshin adamdy keri tartyp tartyp, tejeıtin tyıym sózderden arylýymyz kerek. Al ol árkimniń tiline ıe bolýynan, oılanyp sóıleýinen bastalady. Óıtkeni, árkim ózin ózgertý arqyly aınalasyn da ózgertedi. Sonda ǵana «Jańa Qazaqstandy» birge qura alamyz», - deıdi ol.

Buǵan deıin atalmysh uıymnyń kimderdiń qoldaýymen qurylǵany týraly málimet usynǵan edik.

Foto: instagram.com/zhana.adamdar