Un óndiretin 270 kásiporynnyń úshten biri ǵana qaldy – Senat depýtaty

ASTANA. QazAqparat – Senat depýtaty Zákirjan Kýzıev astyq óńdeý salasyndaǵy problemany atady, dep habarlaıdy QazAqparat tilshisi.

«Astyq óńdeý salasynda un tartýǵa basty ról berilgen. Sonymen qatar, keıingi ýaqytta bul salada úlken problemalar baıqalyp otyr, ıaǵnı onyń damýyna qaýip tóndi. Eger 15 jyl buryn Qazaqstan 270 kásiporyn arqyly óndirilgen un kólemi boıynsha álemde kóshbasshy bolsa, qazir olardyń úshten biri ǵana jumys istep tur», - dedi Z. Kýzıev Senatta ótken Úkimet saǵatynda.

Onyń aıtýynsha, buǵan naryqtaǵy básekelestiktiń kúsheıýi sebep boldy.

«Osyndaı jaǵdaıda biz eki sheshimniń birin qabyldaýymyz kerek, ıaǵnı halyqaralyq naryqtaǵy pozıtsııamyzdy qalpyna keltirý nemese astyqty tereńirek óńdeýge kóshý qajet. Astyq óńdeýdiń birinshi kezeńinde biz jarma, un jáne basqa da ónimdi alamyz, muny kóptegen óńdeýshi iske asyryp keledi. Atap aıtqanda, bizdiń óndirýshilerdi astyqty tereńirek óńdeýge yntalandyrý qajet. Osy oraıda vıtamınder, taǵamdyq qospalar jáne ózge de ónimderdi óńdeýge bolady», - dedi depýtat.

Budan buryn habarlanǵandaı, Senattaǵy Úkimet saǵatynda Aýyl sharýashylyǵy mınıstri Erbol Qarashókeev Qazaqstan unyn ótkizý naryqtary jyl saıyn azaıyp kele jatqanyn aıtty.