Ýmraǵa barǵan ózbekstandyqtar týrıstik kompanııalardyń kesirinen dalada qaldy

<p>ASTANA. KAZINFORM - Áleýmettik jelilerde Mekke men Mádınaǵa ýmra jasaý úshin baryp, elge oralýda belgili bir qıyndyqtarǵa tap bolǵan ózbekstandyq qajylar týraly aqparat tarap jatyr, dep habarlaıdy Kazinform.</p>

Ózbekstannyń Jıddadaǵy bas konsýldyǵynyń málimetinshe, ózbekstandyqtardyń saparlaryn jeke týrıstik kompanııalar uıymdastyrady. Bul jaǵdaı áýe qatynasyn júzege asyrýdaǵy tehnıkalyq aqaýlarǵa, sondaı-aq týrıstik kompanııalardyń mundaı saparlardy uıymdastyrýda qajetti daǵdylary men tájirıbesiniń bolmaýyna baılanysty bolǵan.

Ózbekstannyń kólik mınıstrligi basqa da quzyrly organdarmen birlesip, Ózbekstan azamattaryn elge qaıtarý boıynsha barlyq sharalar qabyldap, qosymsha reıster kestesi jasalǵany atap ótildi.

2024 jyldyń 4 aqpanyndaǵy jaǵdaı boıynsha, qajylardyń bir bóligi Ózbekstanǵa qaıtaryldy, qalǵan azamattar jaqyn arada úılerine qaıtady.

«Ózbekstannyń Er-Rııadtaǵy elshiligi men Jıddadaǵy bas konsýldyǵy jaǵdaıdy baqylaýǵa alyp, turaqty túrde monıtorıng júrgizýde, ózbekstandyqtarǵa qajetti konsýldyq, quqyqtyq jáne basqa da kómekterdi kórsetýde. Joǵaryda aıtylǵandarǵa súıene otyryp, biz azamattarymyzdy sabyrly bolýǵa jáne Saýd Arabııasynda qoldanystaǵy talaptardy saqtaýǵa shaqyramyz», - delingen habarlamada.