Úmitker-kásiporyndar Indýstrııalyq aımaqqa enýleri úshin ekologııalyq normalarǵa sáıkes bolýlary tıis - A. Esimov
Bul týraly búgin Almaty qalasynda Alataý aýdanyndaǵy Indýstrııalyq aımaqqa enýge úmitker ınvestıtsııalyq jobalardy irikteý boıynsha ótken keńeste Almaty qalasynyń ákimi Ahmetjan Esimov málimdedi.
Qala ákiminiń tóraǵalyǵymen bolǵan otyrysta qurylys, tamaq ónerkásibi jáne mashınajasaý salasyndaǵy birqatar jobalar qaraldy.
Qala basshysy kompanııalardan kelip túsip jatqan ótinimderdi qaraý barysynda muqııat ekologııalyq saraptamalar jasalý kerektigin erekshe atap ótti. Ákimniń sózine qaraǵanda, eksporttyq baǵyt pen ımportty almastyrý ustanymy - qala turǵyndarynyń ekologııalyq saýlyǵynan basym túspeýi tıis.
«Qazir, bizde Indýstrııalyq aımaqtan oryn alǵysy keletin kásiporyndar sany kóp. Kópshiliginiń qarjylary jeterlik. Biraq biz sonymen qatar árbir jobanyń ekologııaǵa belgili bir salmaq túsiretindigin jaqsy túsinýimiz kerek. Qandaı kásiporyn bolmasyn, ekonomıkalyq jaǵynan qansha jerden paıdaly bolsa da, biz ony qorshaǵan ortaǵa tıgizetin áseri turǵysynan baǵalaıtyn bolamyz», - dedi Ahmetjan Esimov.
Odan basqa, qala basshysy Almatynyń ortalyǵyndaǵy ónerkásiptik kásiporyndardyń sol Indýstrııalyq aımaqqa kóshirilýiniń mańyzdylyǵyn atap ótti. Bul bir jaǵynan qala ortalyǵyndaǵy kólikter sanyn birshama azaıtsa, ekinshi jaǵynan ekologııalyq ahýalǵa oń áser etedi.
Sondaı-aq, qala ákimi jumys tobyna Indýstrııalyq aımaqta bólinetin jer telimderiniń kólemin muqııat saraptap, jobalardyń júzege asýyn qatań baqylaýǵa alýdy tapsyrdy.
«Árbir jer telimi barynsha tıimdi nátıje berýi tıis, - dedi qala ákimi Ahmetjan Esimov. - Biz bul jobalardyń júzege asýyn muqııat qadaǵalaıtyn bolamyz. Barlyq jobalardyń júzege asýyna naqty merzimder taǵaıyndalady. Ol saqtalýy tıis. Eger de jobalardy júzege asyrý tym uzaqqa sozylyp ketetin bolsa, jer telimderi qaıta alynyp, basqa jobalarǵa beriletin bolady. Bul ereje tıisti qujattarda kórsetilýi kerek».
Jıyn sońynda jalpy somasy 35 682,7 mln. teńgege 5 joba maquldandy. Aldyn ala boljamdar boıynsha, bul - 1,5 myń jumys ornyn ashýǵa múmkindik beredi.