«Umaı» ıpotekasyna ótinim qabyldaý jarty kúnge ǵana sozyldy

ASTANA. QazAqparat – Búgin tańerteń Otbasy bank «Umaı» áıelder ıpoteka baǵdarlamasyna ótinim qabyldaýdy bastaǵan edi. Túske taman ótinimniń kóptep túsýine baılanysty naýqan tez arada toqtatyldy, dep habarlaıdy QazAqparat banktiń baspasóz qyzmetine silteme jasap.

«Umaı» áıelder ıpotekasynyń tartymdy sharttary barlyq satý arnalarynda úlken suranysqa ıe boldy. Biz nesıe berý lımıti kúnniń alǵashqy bóliginde taýsylady dep kútken joqpyz jáne ókinishke qaraı, Qazaqstan boıynsha ótinim qabyldaýdy jabýǵa májbúr boldyq. Azııa damý bankimen yntymaqtastyqtyń osyndaı tabysty tájirıbesi áli jalǵasady dep úmittenemiz. Barlyq jańalyqtardy Instagram jáne YouTube arqyly aıtyp otyramyz. Túske deıin ótinim berip úlgergen baqytty jandardy quttyqtaımyz jáne baspana týraly armandaryńyzdy júzege asyrýda sáttilik tileımiz», - dep jazdy Otbasy bank.

Sondaı-aq, Otbasy bank bul jobany ári qaraı jalǵastyrýdy josparlap otyrǵanyn jetkizdi.

Jobany sol sharttar boıynsha jalǵastyrý úshin Azııa damý bankimen kelissóz júrgiziledi.