Ulytaýda eń úzdik kıiz úıdi polıtseıler tikti

JEZQAZǴAN. QazAqparat - Ulytaý oblysynyń polıtsııa departamenti «Úzdik kıiz úı» saıysynda bas júldege ıe boldy. Jalpy oblys ortalyǵynda 60-qa jýyq kıiz úı tigildi, dep habarlaıdy QazAqparat tilshisi.

Ulystyń uly kúni Jezqazǵan qalasynyń Alashahan dańǵyly boıynda qaz-qatar aqshańqan kıiz úıler boı kóterip, qala jurtshylyǵyna kóterińki kóńil-kúı syılady.

Naýryz meıramyn atap ótýge arnalǵan oblys boıynsha uıymdastyrylǵan is-sharanyń biri ulttyq naqyshta bezendirilgen úzdik kıiz úı baıqaýy boldy.

Barlyq mekemeler atsalysqan saıysta, arnaıy komıssııanyń uıǵarymymen polıtsııa departamentiniń kıiz úıi «úzdik» dep tabylyp, bas júldeni ıelendi.

Merekelik is-shara aıasynda polıtsııa departamentiniń uıymdastyrýymen «Qosh keldiń – áz Naýryz» atty kontserttik baǵdarlama ázirlenip, halyq ánderi shyrqaldy.

Kórermenge án men kúıden tartý jasap, jas jetkinshekterden quralǵan «Jetigenshiler» toby óz ónerlerin ortaǵa saldy.

Polıtsııa qyzmetkerleri jáne «Alǵa, Bas» teatrynan quralǵan ónerpazdar toby qyz uzatý dástúrin sahnalap, jıylǵan jurtqa ulttyq qundylyqtarymyzdan syr sherter qoıylymyn usyndy.

Merekelik kontsertti tamashalaýǵa kelgen kópshilik dástúrli taǵamdardan dám tatty.

Polıtsııa departamentiniń bastyǵy Qaıyrken Álıev oblys turǵyndary men qonaqtaryn mereıli merekemen quttyqtap, keń baıtaq qazaq jeriniń dál júreginde ornalasqan Ulytaýdyń, tól tarıhymyzda alar orny erekshe dep atap ótti.

Shara barysynda ulttyq sport túrlerinen saıystar uıymdastyryldy. Gir kóterý saıysynda básekelesterinen oza shapqan polıtsııa qyzmetkeri Balta Aıdyn bas júlde ıelendi.

Kelesi kezekte «qol kúres» saıysy uıymdastyrylyp, aıqyn basymdylyqpen qarsylas shaq keltirmegen qala turǵyny Qojabergen Ǵalym birinshi oryndy jeńip aldy.

Sonymen qatar, kópshilik taǵatsyzdana kútken «qoshqar kóterý» saıysynan 114 ret kóterip úzdik nátıje kórsetken polıtsııa qyzmetkeri Alpysbaı Marǵulan bas júldege qol jetkizdi.

Saıys jeńimpazdary marapattalyp, syılyq aldy.