Ulytaý, Tańbaly men Otyrardaǵy «Sapar ortalyqtary» 2 jylda salynyp bitpek

  ASTANA. QazAqparat - Ulytaý, Tańbaly men Otyrarda salynatyn «Sapar ortalyqtarynyń» qurylysy úshin kelesi jyly respýblıkalyq bıýdjetten aqsha bólinetin boldy. Bul týraly Astanada «Qazaqstannyń kıeli jerleriniń geografııasy» jobasyn talqylaý boıynsha ótken «Mıras» respýblıkalyq keńesiniń kóshpeli otyrysynda QR Mádenıet jáne sport vıtse-mınıstri Aqtoty Raıymqulova aıtty, dep habarlaıdy «QazAqparat» HAA tilshisi.

«Mádenıet jáne sport mınıstrligi janynan respýblıkalyq deńgeıde birtalaı jobalar júzege asyrylyp jatyr. Ásirese, Qazaqstanda kıeli oryndar kóp shoǵyrlanǵan jerler bar ekenin bilesizder. Sonyń ishinde Ulytaý, Tańbaly, Otyrar tarıhı-mádenı mýzeı qoryqtary aýmaǵynda «Sapar ortalyqtaryn» salý boıynsha bıylǵy jyly mınıstrliktiń ishki qarajaty esebinen jobalyq-smetalyq qujattary daıyndaldy. Keler jyly respýblıkalyq bıýdjetten aqsha bólinip, olardyń qurylystary bastalady. Bir jyldyń ishinde Ulytaý men Tańbalyda, al Otyrarda eki jyldyń ishinde Sapar ortalyqtarynyń qurylysyn bitiremiz dep josparlap otyrmyz», - deıdi Aqtoty Raıymqulova.

Onyń aıtýynsha, Sapar ortalyqtary álemdik tájirıbede óte kóp paıdalanylady.

«Osy ortalyqtar týrıstik jáne ımıdjdik jaǵynan qajetti qadam dep bilemiz. Olardyń ınfraqurylymynda meıramhanalar, sývenır dúkender, sheberhanalar, konferentsııa zaldary, tarıhı jáne zertteý jıyndary ótetin zaldar shoǵyrlanatyn bolady», - deıdi ol.