Ulytaý óńirindegi onkoaýrýlar sebebin anyqtaý jónindegi komıssııa jumysyn aıaqtady

JEZQAZǴAN. QazAqparat – Vedomstvoaralyq komıssııa Ulytaý óńiriniń Jezqazǵan aýmaǵynda onkologııa aýrýlarynyń sebebin zerttedi, dep habarlaıdy QazAqparat.

QR Ekologııa jáne tabıǵı resýrstar mınıstrligi zertteý nátıjesin jarııalady.

Mınıstrlik bıylǵy naýryzda Ulytaý óńiriniń Jezqazǵan qalasynda Baıqońyr ǵarysh aılaǵy qyzmetiniń áserinen onkologııa aýrýlarynyń artý sebebin zerdeleý úshin vedomstvoaralyq komıssııa qurǵan bolatyn.

Ekologııa jáne tabıǵı resýrstar, Densaýlyq saqtaý, Tsıfrlyq damý, Innovatsııalar jáne aeroǵarysh ónerkásibi mınıstrlikteriniń aýmaqtyq bólimsheleri saýda obektilerinde óndiriletin tamaq ónimderinen, jerústi sýlarynan, topyraqtan, atmosferalyq aýadan synama alǵan.

«Onyń qorytyndysy boıynsha Jezqazǵan-Ulytaý óńiriniń aýmaǵynda radıatsııalyq fonnyń asýy jáne atmosferalyq aýanyń lastanýy tirkelgen joq. Onymen qosa, ýly elementter (kadmıı, qorǵasyn, myshıak) men geptıldiń shamadan tys kórsetkishteri anyqtalǵan joq», - delingen Ekologııa mınıstrliginiń aqparatynda.

Degenmen, vedomstvodan málim etkendeı, Ulytaý oblysynyń Jezqazǵan-Ulytaý aýmaǵynda onkologııa aýrýlarynyń týyndaý sebebin, sonyń ishinde Baıqońyr ǵarysh aılaǵynyń áserin anyqtaý úshin ǵylymı-zertteý jumystaryn tereńirek júrgizýdi qajet.

«Sondaı-aq Ulytaý oblysy ákimdiginiń 2022 jylǵy 21 qazandaǵy №28/02 Qaýlysymen aýmaqty (akvatorııany) zerdeleý boıynsha komıssııa quryldy, aýmaqty tótenshe ekologııalyq jaǵdaı aımaǵy nemese ekologııalyq apat aımaǵy dep jarııalaý boljanýda», - delingen mınıstrlik habarlamasynda.

Bıylǵy 16 qańtarda Májiliste Ulytaý oblysynyń Jezqazǵan-Ulytaý aýmaǵynda Baıqońyr ǵarysh aılaǵy qyzmetiniń áserinen onkoaýrýlardyń kóbeıýin zerdeleý jónindegi vedomstvoaralyq komıssııanyń otyrysy ótken bolatyn.

«Otyrys qorytyndysy boıynsha eki komıssııany Tótenshe ekologııalyq jaǵdaı aımaǵy nemese ekologııalyq apat aımaǵy dep jarııalaý boljanatyn aýmaqty (akvatorııany) zerdeleý jónindegi komıssııa sheńberinde biriktirý sheshimi qabyldandy.

Onkologııalyq aýrýlardyń ósý sebepterin zerdeleý jónindegi komıssııa jumysynyń máni Tehnıkalyq tapsyrmada ıntegratsııalanǵanyn eskere otyryp, Baıqońyr ǵarysh aılaǵy qyzmetiniń áseri turǵysynan Ulytaý oblysynyń Jezqazǵan-Ulytaý aýmaǵyna onkologııalyq aýrýlardyń sebepterin zertteý jónindegi komıssııanyń jumysy aıaqtaldy.

Búgingi kúni Ulytaý oblysynyń ákimdigi ǵylymı-zertteý jumysyn júrgizýge konkýrs ótkizdi. Konkýrs nátıjesine sáıkes «Ekoservıs-S» JSSh jeńimpaz retinde anyqtaldy», - delingen Ekologııa mınıstrliginiń aqparatynda.