Ulytaý oblysynyń jedel járdem qyzmetine jańa avtokólikter tabystaldy

JEZQAZǴAN. QazAqparat – Ulytaý oblysy densaýlyq saqtaý basqarmasynyń jedel medıtsınalyq járdem stantsııasynyń bazasynda arnaýly avtokólikterdiń kiltteri saltanatty túrde tapsyryldy, dep habarlaıdy QazAqparat Densaýlyq saqtaý mınıstrliginiń telegram kanalyna silteme jasap.

Ulytaý oblysynyń ákimi Berik Ábdiǵalıulynyń aıtýynsha, óńirdiń áleýmettik-ekonomıkalyq damýynyń 2022-2026 jyldarǵa arnalǵan keshendi jospary iske asyrylyp jatyr. Onyń aıasynda densaýlyq saqtaý salasy boıynsha túrli kózderden qarjylandyrylatyn 19 joba kózdelgen. Máselen, oblystyq jedel járdem stantsııasy úshin 7 arnaýly avtokólik pen 5 reanımobıl, 7 mobıldik garaj kesheni men Sátbaev qalasynyń emhanasyn satyp alý josparlanǵan.

Búgin 2022 jyly shyqqan 4 JAC pen 3 Gazel-Neks jedel járdem kóliginiń kiltteri tabys etiledi.

«Oblystyq jedel medıtsınalyq járdem stantsııasyn jańa avtomobıldermen qamtamasyz etý óńirdegi medıtsınalyq qyzmetterdiń sapasyn arttyrýǵa yqpal etetini sózsiz», - dep esepteıdi óńir basshysy.

Jańa jedel járdem mashınalaryn Jezqazǵan (2), Sátbaev (2) qalalarynyń, Qarajal qalasy Jáırem kentiniń (1), Jańaarqa aýdanynyń (1), Ulytaý aýdany Jezdi kentiniń (1) jedel medıtsınalyq járdem stantsııalary aldy. Bul sanıtarııalyq kólikter zamanaýı portatıvti medıtsınalyq jabdyqtarmen jabdyqtalǵan.