Ulytaý oblysynyń bıýdjeti bekitildi

JEZQAZǴAN. QazAqparat – 19 shilde kúni oblys máslıhaty Ulytaý oblysynyń 2022-2024 jyldarǵa arnalǵan bıýdjetin qabyldady. Osy oraıda bıýdjet qarajaty oblys aýmaǵyndaǵy áleýmettik nysandardyń jáne ınfraqurylym jelileriniń qurylysyn júrgizýge baǵyttalatyn bolady, dep habarlaıdy QazAqparat tilshisi.

«Oblys bıýdjeti Qaraǵandy oblysynyń bıýdjetin bólý jáne aýdandar (qalalar) bıýdjetterinen beriletin transfertter esebinen qalyptastyryldy. Qaraǵandy oblysynyń 610 mlrd 161,3 mln teńgeni quraıtyn bıýdjetin bólý kezinde Ulytaý oblysynyń bıýdjetine túsimder úlesi 17 paıyzdy nemese 103,5 mlrd teńgeni, al shyǵystar úlesi 15,6 paıyzdy nemese 95,3 mlrd teńgeni qurady. Oblys aýmaǵynda «Qazaqmys» kompanııalar tobynyń 9 kásipornyn qaıta tirkeýge baılanysty bıýdjet kirisine qosymsha taǵy 8,2 mlrd teńge túsedi. Bul oblystyń jańadan qurylý satysynda bıýdjet úshin erekshe mańyzǵa ıe», - delingen Ulytaý oblysy ákimdigi baspasóz qyzmetiniń málimetinde.

2022 jylǵa arnalǵan oblys bıýdjetiniń kiris bóligi qosymsha túsimdermen birge 29,8 mlrd teńgeni qurady. Aýdandar men qalalardan túsetin transfertter 13,8 mlrd teńgege jetti. Osy jyl bıýdjetiniń barlyq túsimderi 43,7 mlrd teńge boldy (nysanaly transferttersiz jáne sýbventsııalarsyz).

«Aldaǵy bıýdjetti naqtylaý kezinde qosymsha taǵy 83 mlrd teńge kózdeletin bolady. Onyń ishinde 23,5 mlrd teńge respýblıkalyq bıýdjetten sýbventsııa, 33,7 mlrd teńge nysanaly transfert, 10,7 mlrd teńge óńirlerge transfert, asyra oryndaý esebinen - 15 mlrd teńge. Bıýdjet shyǵystarynyń negizgi úlesi áleýmettik salaǵa tıesili. Bul salaǵa jalpy shyǵystardyń 54 paıyzy (16,2 mlrd teńge), turǵyn úı-kommýnaldyq sharýashylyǵy, jolaýshylar kóligi jáne avtomobıl joldaryna – 14 paıyz, aýyl sharýashylǵy jáne veterınarııaǵa 3 paıyz baǵyttalady», - dep naqtylady baspasóz qyzmeti.

Oblystyq bıýdjettiń shyǵystary 30,8 mlrd teńge kóleminde bekitildi. Bul qarajattyń 82,8 paıyzy aǵymdaǵy shyǵystarǵa (birinshi kezektegi shyǵystar - jalaqy, stıpendııalar, memlekettik mekemelerdi, mektepterdi, mádenıet, densaýlyq saqtaý obektilerin, kolledjderdi jáne t. b. ustaýǵa), 14,5 paıyzy túrli jobalardy iske asyrýǵa baǵyttalatyn bolady.

Osy jyldyń basynan bastap Qaraǵandy oblysynyń bıýdjetinen bastalǵan jobalarǵa jumsalatyn shyǵyndar Ulytaý oblysynyń bıýdjetinde bekitilgenin atap ótý kerek. Bul – mektepterdi pánder boıynsha mýltımedııalyq jáne ınteraktıvti kabınettermen jabdyqtaý, Ulytaý aýdanynyń Sarysý, Borseńgir aýyldarynyń 2 mektebin kúrdeli jóndeý, Jezqazǵan qalasynyń onkologııalyq ortalyǵyn jóndeý, oblystyq mańyzy bar avtomobıl joldaryn ortasha jóndeý, qalalar men aýdandardyń avtomobıl joldaryn ortasha jóndeý, Jezqazǵan qalasynyń tazartý qurylystaryn qaıta jańartý, Jańaarqa kentiniń negizgi sý tartqyshyn qaıta jańartý syndy iri shyǵystar.

Budan buryn habarlanǵandaı, Berik Ábdiǵalıuly Ulytaý oblysy bıýdjetiniń bekitilýine oraı, óńirdegi mańyzdy nysandardyń qurylysy júrgiziletinin aıtty.

Óńir ákimi mal sharýashylyǵyn damytý úshin qandaı iri joba iske qosylatynyn da atap ótti.