Ulytaý oblysynyń ákimi óńirde mal sharýashylyǵyn damytý múmkindigin aıtty

JEZQAZǴAN. QazAqparat – Ulytaý oblysynda et óńdeýge arnalǵan aýqymdy kásiporyn salynady. Bul týraly aımaq ákimi Berik Ábdiǵalıuly aıtty, dep habarlaıdy QazAqparat tilshisi.

«Aýyl sharýashylyǵyn damytýda kedergi keltirip otyrǵan másele et fabrıkasynyń bolmaýyna qatysty bolyp otyr. Bizdiń óńirdegi aýdandarda mal barshylyq. Osy oraıda maldyń basym bóligin ońtústik óńirlerge áketip jatyr. ıAǵnı osy tasymaldanyp jatqan mal basy ońtústikte bordaqylanyp, etke ótkiziledi. Bizge osynyń barlyǵyn oblys aýmaǵynda uıymdastyrý kerek», - dedi B. Ábdiǵalıuly Óńirlik kommýnıkatsııalar qyzmetinde.

Onyń aıtýynsha, óńirde aýqymdy et kombınaty qurylatyn bolady. Sondyqtan ınvestormen kelissóz júrgizilip jatyr.

«Qazir ındýstrııa aımaǵy aıqyndalyp jatyr. Sol jerge ınjenerlik jelilerdi tartyp qoımaqpyz. Aldaǵy jyly atalǵan nysannyń qurylysyn bastaımyz degen jospar bar. Aldyn ala esepteý boıynsha 7 mlrd teńge qarajat kerek bolyp tur. Onyń ishinde kem degende 3 myń bas maldy bordaqylaý alańy bolady. Etti óńdeý, konservileý, shujyq ónimderin shyǵarý kásiporyndary jasaqtalmaq. Bul ónimdi syrtqa shyǵarý múmkindigi de qarastyrylǵan», - dedi oblys ákimi.

Onyń aıtýynsha, óńirde jylqynyń, iri qara mal basynyń sany kóbeıip keledi. Alaıda, qoı sanynyń azaıǵany baıqalyp otyr.

Budan buryn habarlanǵandaı, Berik Ábdiǵalıuly Ulytaý oblysy bıýdjetiniń bekitilýine oraı, óńirdegi mańyzdy nysandardyń qurylysy júrgiziletinin aıtty.