Ulytaý oblysyndaǵy 72 aýyldyń jartysy aýyz sýmen qamtylmaǵan

JEZQAZǴAN. QazAqparat – Ulytaý oblysyndaǵy 72 aýyldyń jartysy aýyz sýmen qamtylmaǵan. Bul týraly Premer-Mınıstr Álıhan Smaıylovtyń tóraǵalyǵymen ótken oblystyń áleýmettik-ekonomıkalyq damýynyń ózekti máseleleri boıynsha keńeste málim boldy, dep habarlaıdy QazAqparat Úkimettiń resmı saıtyna silteme jasap.

Úkimet basshysy atap ótkendeı, jergilikti halyqty tolǵandyratyn ózekti máselelerdiń biri – sapaly aýyz sýmen qamtamasyz etý. Bul másele Jezqazǵan men Sátbaev qalalarynda asa ózekti.

Byltyr óńirde Úıtas-Aıdos jer asty sýlary ken ornynyń sorǵy stansasyn rekonstrýktsııalaý bastaldy. Joba 2024 jyly aıaqtalady dep josparlanǵan. Sonymen qatar, bıyl kópten beri bitpeı kele jatqan Esqula sý qubyrynyń qurylysy aıaqtalýy tıis.

Oblystaǵy 72 aýyldyń tek 38-i ǵana aýyz sýmen qamtamasyz etilgen.

Osyǵan baılanysty ákimdik jergilikti bıýdjetten 30 aýyldy keshendi blok-modýldermen jabdyqtaýǵa qarajat qarastyrýy qajet. Al, qalǵandary boıynsha keıinnen respýblıkalyq bıýdjetten qarjylandyrý úshin jobalyq-smetalyq qujattama ázirleýdi jedeldetý kerek

, - dep tapsyrdy Premer-Mınıstr.