Ulytaý oblysynda jol apatynan 35 jastaǵy áıel kóz jumdy

ULYTAÝ. QazAqparat - «Pavlodar – Qyzylorda» tasjolynda shaǵyn avtobýs aýdarylyp, 35 jastaǵy áıel qaza tapty, dep habarlaıdy QazAqparat Ulytaý oblystyq polıtsııa departamentiniń baspasóz qyzmetine silteme jasap.

Esterińizge sala keteıik, búgin tańerteń saǵat 06.40 shamasynda Aqtúbek kentiniń janynda «Pavlodar – Qyzylorda» tasjolynda jolaýshylary bar shaǵyn avtobýs aýdarylyp, 3 adam zardap shekken bolatyn.

«53 jastaǵy «Mersedes sprınter» avtokóliginiń júrgizýshisi aldyn-ala málimetter boıynsha, aýa-raıy qolaısyzdyǵyna baılanysty rýldi basqara almaı, aýdarylyp qalǵan. Apat saldarynan oqıǵa ornynda 35 jastaǵy jolaýshy qaıtys boldy»,- dep habarlady Ulytaý oblysy PD baspasóz qyzmeti.

Kýágerlerdiń aıtýynsha, avtobýs salonynda vahtamen jumys isteıtin adamdar bolǵan. Olar úılerine qaıtyp bara jatqan. Avtobýs aýdarylǵan kezde salonda 20 adam bolǵan. Olardyń úsheýi jaraqat alyp, bireýi aýrýhanaǵa jetkizilgen.

«Apat bolǵan jerge medıtsınalyq-qutqarý pýnktiniń qyzmetkerleri bardy. Olar patsıentterge kómek kórsetti. Olardyń biri Jańaarqa aýdanynyń ortalyq aýrýhanasyna jetkizildi. 1964 jyly týǵan áıeldiń sol jaq súıeginde jabyq synyq pen súıektiń jyljyp ketýi jáne muryn súıekteriniń ashyq synýy anyqtaldy. Ol Qaraǵandydaǵy Maqajanov atyndaǵy klınıkaǵa jiberildi», - dep habarlady Jańaarqa aýdanynyń ortalyq aýrýhanasynan.

Atalmysh fakti boıynsha QR QK 345-baby 3-bóligi boıynsha sotqa deıingi tergeý bastaldy jáne tıisti saraptamalar taǵaıyndaldy.

Osyǵan deıin Ulytaý oblysynda jolaýshylar mingen avtobýstyń apatqa ushyraǵanyn jazǵan bolatynbyz.