Ulytaý oblysynda Kanada ýnıversıtetimen birlesken memlekettik JOO ashylady

ASTANA. QazAqparat – Ulytaý oblysynda kanadalyq ýnıversıtetpen birlesken qos dıplom usynatyn memlekettik joǵary oqý orny ashylady. Bul jaıynda aımaq ákimi Berik Ábdiǵalıuly ortalyq kommýnıkatsııalar qyzmetiniń kóshpeli brıfıngisinde málim etti, dep habarlaıdy QazAqparat tilshisi.

«Bizde memlekettik joǵary oqý oryndary joq. Tek jekemenshik ýnıversıtet bar. Osyǵan baılanysty qazir kanadalyq joǵary oqý oryndarymen seriktestik arqyly qos dıplom berý shartymen ýnıversıtet ashý jospary qolǵa alyndy. Qazir Ǵylym jáne joǵary bilim mınıstrligimen kelissóz júrip jatyr. Kúzde resmı tirkelýi kerek. Endigi jyly stýdentterdi qabyldaý baǵytynda jumys atqaramyz», - dedi ákim.

Onyń sózine qaraǵanda, oblys Qazaqstannyń ortalyǵynda tursa da, transport tuıyqtyǵyna tap kelip otyr.

«Qyzylorda – Jezqazǵan baǵytyndaǵy joldyń problemasy talaıdan beri eldiń kókeıinde júr. Memleket basshysynyń tapsyrmasy da bar. Indýstrııa jáne ınfraqurylymdyq damý mınıstrliginiń málimeti boıynsha, shilde aıynda qaıta konkýrs jarııalanady. Sóıtip kúzde daıyndyq jumystaryn bastap ketý josparlanǵan. Negizgi jumys endigi jyly bastalýy kerek. Ulytaý – Arqalyq baǵyty boıynsha bıyl 20 shaqyrymynda jóndeý bastaldy. Al Jezqazǵan – Qaraǵandy baǵyty boıynsha bizge tıesili 30 shaqyrymda jóndeý jumystaryn bastaý kózdelip otyr. Sonymen qatar 7,5 mlrd teńgege 48 respýblıkalyq jáne 35 oblystyq mańyzdaǵy joldy jóndeý kózdelgen. Budan bólek, 137 shaqyrym bolatyn qalaishilik jáne kenishilik joldardy retteý josparda tur», - dedi Berik Ábdiǵalıuly.