Ulytaý oblysynda bıyl 28 kópqabatty turǵyn úı boı kótermek
2023 jyly Ulytaý oblysynda 1812 jáńa páterdiń kilti tapsyrylyýy tıis.
Óńirdiń qalalary men aýdandarynda jalpy aýdany 120 myń sharshy metrdi quraıtyn 28 kópqabatty turǵyn úı qurylysy josparlanǵan.
Onyń ishinde respýblıkalyq bıýdjet qarajaty esebinen 14 kópqabatty turǵyn úı boı kótermek.
Jezqazǵan qalasynda Alashahan jáne Gagarın kóshelerinde 298 páterli 6 turǵyn úı salynady.
Al Sátbaev qalasynda Shatalıýk, Qunanbaev jáne Táýelsizdik kóshelerinde 3 turǵyn úı qurylysy bastalǵan.
Sonymen qatar aýdandarda da qarqyndy qurylys jumystary bastalyp ketken.
Jańaarqa aýdanynda 5 turǵyn úıden kelesi jylǵa deıin 228 páterdiń kilti tabystalady dep kózdelip otyr.
Budan bólek jeke qurylys salýshylarmen Jezqazǵan torabynda 4 úıdiń jáne Sátbaev qalasynda 2 turǵyn úı qurylysyn bastaý josparlanýda.
«Oblys boıynsha 5000-nan astam adam baspanaǵa kezekte tur. Ol úshin biz qalalyq jáne respýblıkalyq bıýdjetten aqsha suratyp jatyrmyz. Respýblıkalyq bıýdjetten 7 nesıelik úı salýǵa ótinim ótkizip qoıdyq. Qazir sony kútip otyrmyz. Odan bólek jeke kásipkerlerdiń salyp jatqan úıleri bar», - dep málimdedi Ulytaý oblysynyń qurylys, sáýlet jáne qala qurylysy basqarmasy basshysynyń m.a. Baqtııar Pardabekov.
Sondaı-aq, bıyl Prezıdenttiń tapsyrmasyna sáıkes ortalyq memlekettik jáne quqyq qorǵaý organdarynyń bólimshelerine ornalastyrylǵan memlekettik qyzmetshilerdi turǵyn úımen qamtamasyz etý úshin QR Úkimetiniń rezervi esebinen 11 kópqabatty turǵyn úıdiń qurylysyn bastaý josparlanǵan.
«Eki úıdiń qurylysy bastaldy. Jalpy 7 úıdiń qujaty saraptamadan shyqty. Qalǵan 4 úıdiń qujattaryn kútip otyrmyz. Jaqyn arada shyǵady. Sodan soń bıýdjettik ótinimge ótkizemiz. Biraq merdigerler oǵan qaramaı, qazir óz qarajaty esebinen 2 úıdiń qurylysyn bastap ketti. Qalǵan 5 úıdiń qazan shuńqyryn qazý jumysy júrip jatyr. Negizi jospar boıynsha ol 2023-2024 jyldarǵa arnalǵan», - dep tolyqtyrdy Baqtııar Pardabekov.
Sonymen qatar áleýmettik salada keshendi damý josparyna saı Ulytaý oblysynda 47 jańa nysan salynady dep kózdelgen.
Bıyl quny 1,47 mlrd teńge bolatyn Jezqazǵan qalasyndaǵy Abaı atyndaǵy mamandandyrylǵan daryndy balalar mektebi úshin 200 oryndyq jataqhana salý josparlanǵan.
Nysan 2024jyly paıdalanýǵa berilýi tıis.
Jezqazǵan qalasynyń qoldanystaǵy Bas jospary 2015 jyly bekitilgen.
Oblys ortalyǵy mártebesine ıe bola otyryp, mádenıet, bilim berý, sport, densaýlyq saqtaý, ákimshilik jáne rekreatsııalyq maqsattaǵy jańa nysandardy jáne basqa da ǵımarattardy ornalastyrý qajettigi týyndaǵan.
Osyǵan baılanysty qazirgi ýaqytta qala aýmaǵyn 2 100 gektarǵa deıin damyta otyryp, qurylǵan qalanyń bas jospary túzetý satysynda.
2023 jyldyń tamyzynda tolyǵymen jasalyp bitýi tıis.