Ulytaý oblysynda bir aýyldyń turǵyndary túgel ishimdikten bas bartty

ULYTAÝ. QazAqparat – Ulytaý oblysy Jańaarqa aýdanyndaǵy Sáken Seıfýllın aýylynyń turǵyndary alkogoldi sýsyndardan bas tartqan. «Aşy sýdan» arylǵaly aýylda bir de bir ret qylmys pen tártip buzý faktileri tirkelmegen, dep habarlaıdy QazAqparat tilshisi.

Mundaı sheshimdi Sáken Seıfýllın aýylynyń turǵyndary óz erkimen qabyldaǵan, eshkim májbúrlemegen. Bastamashy – aýyl jastary.

Aldymen «aşy sý» dastarhannan ketse, sońyra dúken sórelerinen de múldem joǵalǵan.

Jergilikti kásipkerler alkogol ónimderin satýdy jáne jetkizýdi toqtatqan. Ol úshin aýyldastarynan sheksiz alǵys alyp, qurmetke ıe bolyp otyr.

«Bizdiń jastar óte belsendi. Bárimiz alkogol sýsyndaryn ishýge qarsymyz. Spırttik ishimdikten bas tartýdyń nátıjesinde aýylymyzda tynyshtyq ornady», - deıdi aýyl turǵyndarynyń biri.

Aýyl turǵyndarynyń densaýlyǵynan basqa, alkogolden bas tartý tártip ornaý kórsetkishterin jaqsartýǵa yqpal etken.

Sońǵy úsh jylda bir de bir quqyqbuzýshylyq tirkelmegen.

«Bizdiń aýyldyq okrýgtiń quramyna 3 eldi meken kiredi. Onda 1000-ǵa jýyq adam turady. Osy jyldar ishinde aýyl turǵyndary spırttik sýsyndardan bas tartqannan beri birde-bir quqyq buzýshylyq bolǵan joq. Bizdiń jastar mal sharýashylyǵymen aınalysady jáne tynymsyz eńbek etedi», - deıdi Sáken aýylynyń ýchaskelik ınspektory Sáken Kartaev.

Aýyl turǵyndarynyń aıtýynsha, jergilikti halyqtyń eshqaısysy esigin qulyptamaıdy eken, óıtkeni urlyq joq.

Jastar sportpen nemese aýyl sharýashylyǵyn damytýmen aınalysady.

Mal sharýashylyǵynyń qarqyndy ósip jatqanyna shaǵyn aýylda jumys isteıtin 85 sharýa qojalyǵy dálel.