Ulytaý oblysynda 9,5 myńnan astam jumys orny qurylady

ASTANA. QazAqparat – Ulytaý oblysynyń ákimi Berik Ábdiǵalıuly halyqty jumyspen qamtý sharalary týraly aıtyp berdi, dep habarlaıdy QazAqparat tilshisi.

Aıta keteıik, búgin Úkimette Ulytaý oblysyn qaıta jańǵyrtý jónindegi keshendi jospar tanystyryldy.

«Ulytaý oblysynyń áleýmettik-ekonomıkalyq damýynyń 2022-2026 jyldarǵa arnalǵan keshendi jospary óńirdiń ınvestıtsııalyq tartymdylyǵyn arttyrýǵa jáne bıznestiń ekonomıkalyq belsendiliginiń ósýi úshin qolaıly jaǵdaılar jasaýǵa baǵyttalǵan. 9,5 myńnan astam jumys ornyn qurý jáne 1 trıllıon teńgeden astam jeke ınvestıtsııa tartý mýltıplıkatıvti áser beredi», - dedi Berik Ábdiǵalıuly Úkimettiń búgingi otyrysynda.

Ákimniń aıtýynsha, kásipkerlikti damytý maqsatynda «Qarapaıym zattar ekonomıkasy» baǵdarlamasynyń quraldary belsendi qoldanylady jáne «Tabysqa jetý joly» óńirlik kásipkerlikti qoldaý baǵdarlamasy sheńberinde jańa bıznes ıdeıalardy iske asyrý úshin memlekettik granttar berilip, Jezqazǵan qalasynda kóterme-taratý ortalyǵy salynady.

«Agroónerkásiptik keshen salasynda 11 ınvestıtsııalyq jobany iske asyrý óńirge 8 mlrd teńgeden astam ınvestıtsııa tartýǵa múmkindik beredi jáne oblys turǵyndaryn et jáne sút ónimderimen, kartoppen jáne kókónistermen qamtamasyz etedi», - dedi B. Ábdiǵalıuly.

Sondaı-aq, óńirge týrısterdi tartý úshin Jezqazǵan qalasynda qonaq úı keshenderi, Ulytaý aýdanynda týrıstik ortalyq jáne sanatorıı úlgisindegi demalys úıi salynady.