Ulytaý oblysynda 19 jolaýshy mingen avtobýs aýdaryldy

ULYTAÝ. QazAqparat – Ulytaý oblysynda 19 jolaýshy mingen shaǵyn avtobýs aýdaryldy. Saldarynan 3 adam zardap shekti, dep habarlaıdy QazAqparat Tótenshe jaǵdaılar mınıstrligine silteme jasap.

«16 qarashada Baıdaly bı aýylynyń mańyndaǵy «Qyzylorda – Pavlodar» avtojolynyń 722-shaqyrymynda shaǵyn avtobýstyń júrgizýshisi rýlge ıe bola almaı qalyp, 19 jolaýshy mingen kóliktiń aýdarylýyna jol berdi. Jol-kólik oqıǵasy saldarynan 3 adam zardap shekti», - delingen málimette.

Oqıǵa týraly habarlama Ulytaý oblysynyń trassa boıyndaǵy «Aqtúbek» medıtsınalyq-qutqarý pýnktiniń (TMQP) dıspetcherine Jańaarqa aýdany Tótenshe jaǵdaılar bóliminen túsken.

«Oqıǵa ornyna arnaıy reanımobılmen jol boıyndaǵy pýnkt brıgadasy dereý jetti.

TMQP brıgadasy zardap shekken 3 adamǵa kómek kórsetti. Zardap shekken 1 adam ortasha dárejedegi jaraqattarmen Jańaarqa aýdanynyń ortalyq aýdandyq aýrýhanasyna jatqyzyldy», - delingen mınıstrlik aqparatynda.

Foto: gov.kz