Ulytaý oblysynan Almatyǵa júrdek poıyz qatynaı bastady

JEZQAZǴAN. QazAqparat – Jezqazǵan men Almaty qalalarynyń arasynda júrdek poıyz qatynaı bastady. Sonyń arqasynda jezqazǵandyqtar ońtústik astanaǵa endi 7 saǵatqa tezirek jete alady, dep habarlaıdy QazAqparat tilshisi.

Búgin mys shaharynan «Jezqazǵan-Almaty» baǵyty boıynsha «Talgo» júrdek poıyzynyń alǵashqy reısi jolǵa shyqty. Jol júrý ýaqyty 27 saǵattan 19-ǵa azaıdy.

Qala basshylarynyń aıtýynsha, Almatyǵa poıyz buǵan deıin de qatynaǵan. Alaıda reıs biraz ýaqytqa toqtatylǵan. Búgin ol jańa qurammen jáne yńǵaıly jaıdaıdy qamtamasyz ete otyryp qaıta jandandy.

«Týrıstik salada Ulytaý oblysy úlken qalalarmen logıstıka boıynsha úlken áleýetke ıe. Buǵan búgingi «Jezqazǵan-Almaty» baǵytynyń ashylýy dálel. Ózderińiz biletindeı, biz áýe reısteriniń sanyn da kóbeıtip jatyrmyz. Osynyń barlyǵy Ulytaý oblysyna respýblıkamyzdyń úlken qalalarynan qonaqtardyń kelýine yqpal etedi», - deıdi Ulytaý oblysy ákiminiń birinshi orynbasary Aman Barıkenov.

«Almaty-Jezqazǵan» júrdek poıyzy 22 vagonnan turady. Bılet baǵasy 9500 teńgeden bastalady. 15 myń teńgege lıýksten oryn satyp alýǵa bolady. Sonymen qatar múmkindigi shekteýli jolaýshylarǵa arnalǵan arnaıy jabdyqtalǵan kýpe bar. Múgedektikti rastaıtyn kýálikti kórsetken jaǵdaıda bılet 90 paıyzdyq jeńildikpen satylady.

Kestege sáıkes júrdek poıyz Almatydan taq kúnderi, Jezqazǵannan jup kúnderi jóneltiledi. Ulytaý oblysyndaǵy Qyzyljar, Jańaarqa jáne Jezqazǵan temirjol stantsııalarynda aıaldamalar jasalady dep boljanyp otyr. «Jolaýshylar tasymaly» kompanııasy osy aıdyń sońyna deıin Jezqazǵannan taǵy bir júrdek poıyzdy iske qosýdy josparlap otyr. Bul joly Nur-Sultan qalasyna.