Ulytaý oblysyn gazdandyrýǵa 9,7 mlrd teńge jumsalmaq

ASTANA. QazAqparat – Ulytaý oblysyn gazdandyrýǵa 2027 jylǵa deıin 9,7 mlrd teńgeden astam qarajat jumsalmaq, dep habarlaıdy QazAqparat tilshisi.

Bul týraly Energetıka mınıstrliginiń bıýdjettik baǵdarlamasynyń jobasynda aıtylǵan.

Qujattaǵy málimetke súıensek, Ulytaý oblysyn gazdandyrýǵa bıyldyń ózinde 500 mln teńge qarastyrylǵan. Bul aqsha Qaraǵandy oblysy Jańaarqa aýdanynyń Atasý kentinde gazben jabdyqtaýdyń taratý jelileri bar «Atasý» AGTS jáne gaz qubyry tarmaǵyn salýǵa baǵyttalmaq. Jalpy osy jobaǵa 2024 jyly 2 mlrd teńge, 2025 jyly 2 mlrd teńge, 2026 jyly 2 mlrd 287 mln 733 myń teńge bólý kózdelgen.

Sondaı-aq, 2024 jyly «Sary-Arqa» magıstraldik gaz qubyrynyń «Jezqazǵan» avtomatty gaz taratý stansasynan Jezqazǵan qalasyna gaz taratatyn jeliler salýǵa 2 mlrd 924 mln 772 myń teńge kózdelip otyr.