Ulymnyń Otan úshin janyn qıǵanyna ókinbeımin - qaza bolǵan jaýyngerdiń anasy

AQTÓBE. QazAqparat - Aqtóbe jurty búgin ótken jyldyń 5 maýsymy kúni lańkestermen shaıqasta qaza bolǵan áskerı qyzmetkerlerdi eske alyp, olardyń ergiline taǵzym etti, dep habarlaıdy QazAqparat tilshisi.

Aqtóbedegi eske alý sharasy kezinde qaza bolǵan moıor Danıel Maılybaev, serjant Berik Qalıev pen jaýynger Dosbol Sapardyń ata-anasy №6655 áskerı bólimine keldi. Eske alý sharasy kezinde «Máńgilik sapta» taqtasy ashyldy.

Al jıynǵa qatysqan ata-analar balalaryn eske alyp, olardyń erlikterin úlgi etti. 

«Otan úshin janyn qıǵanyna eshqashan ókinbeımin, maqtanyshpen aıta alamyn. Tek Dosbol jas ketti dep ókinemin. Ulym Otan qorǵaý jolynda abyroımen sheıit boldy. Kóz jumdy dep te aıta almaımyn. Quran Kárimde «Otan qorǵaý jolynda qaza bolǵan adamdar sheıit boldy» dep aıtylady eken», - dedi qatardaǵy jaýynger Dosbol Sapardyń anasy Juldyz Qudabaeva.

Dosbol Sapar - otbasynyń tuńǵyshy. Onyń Gúlnur atty qaryndasy, Erbol atty inisi ósip keledi.

 

«Jasulandyqtarǵa «patrıot bolyńdar» dep aıtqym keledi. Jas urpaqqa dinı ekstremızmge qarsy bolyńdar dep aıtamyn. Bizdiń maqsatymyz - beıbit, egemendi elde ómir súrý. Erlik eshqashan umytylmaıdy, erlik tektilikten shyǵady. Balam Dosbol Qara qypshaq Qobylandynyń, Beıbarys sultannyń shóberesi, solardyń urpaǵy ekenin taǵy bir ret dáleldedi. Keshe ǵana muraǵatty qarap otyryp mektepte jazǵan shyǵarmasyn taýyp aldym. Ol jerde «Kim bolamyn?» atty taqyrypta shyǵarma jazylǵan. Dosbol «Men áskerge baramyn, áskerı adam bolamyn» depti. Onyń armany oryndaldy», - dedi J. Qudabaeva. Anasy balasyn eske alyp, jyr shýmaqtaryn arnady.