Ulyqbek Esdáýlettiń mereıtoıy týǵan jerinde keńinen atalyp ótti

ÓSKEMEN. QazAqparat - Aıtýly aqyn, Qazaqstannyń eńbek sińirgen qaıratkeri Ulyqbek Esdáýletti mereıtoıymen quttyqtaýǵa shyǵystyń shyǵarmashylyq ıntellıgentsııasy, oqyrmandar men qoǵam ókilderi túgel jınaldy. Bul merekelik shara oblys ákimdiginiń qoldaýymen ótti, dep habarlaıdy QazAqparat.

Óskemendegi A.Pýshkın atyndaǵy oblystyq kitaphanada Ulyqbek Esdáýletpen kezdesý ótti. Onda kelýshiler Qazaqstan Jazýshylar odaǵynyń tóraǵasy, «Qurmet» ordeniniń ıegeri, «Qazaqstannyń eńbek sińirgen qaıratkeri» Ulyqbek Esdáýlettiń shyǵarmashylyǵynan syr shertetin kitap kórmesin tamashalady. Kórmege aqynnyń «Juldyz jaryǵy», «Altaıdyń altyn tamyry», «Ulystyń uly kúni», «Aq kerýen», «Jaratylys», «Jýrektegi jarylystar», «Zaman-aı», «Kıiz kitap», «Qara pıma» jáne «Yntyq zar» atty kitaptary qoıyldy.

Kezdesýdi Qazaqstan Jazýshylar odaǵy oblystyq fılıalynyń dırektory, belgili qalamger Álibek Qańtarbaev júrgizip otyrdy. Ol mereıtoı ıesiniń ómir jolyna, shyǵarmashylyǵyna toqtalyp ótti. Budan soń jas aqyndar men zııaly qaýym aqynnyń óleńderin mánerlep oqyp, antııadrolyq qozǵalystyń ánuranyna aınalǵan «Zaman-aı» ánin birge shyrqady. Basqosý barysynda U. Esdáýlet Qazaqstan Jazýshylar odaǵyndaǵy jumys barysy men bolashaqtaǵy shyǵarmashylyq josparlarymen bólisti.

Kezdesýde aqynǵa kútpegen tosyn syı retinde Qazaqstannyń halyq ártisi Roza Rymbaevanyń beınequttyqtaýy kórsetildi. Beınequttyqtaýda halyq ártisi U. Esdáýlettiń «Nevada-Semeı» halyqaralyq antııadrolyq qozǵalysyna qosqan úlesi zor ekenin atap ótti.

Kezdesý sońy oblystyq drama teatrda ótken «Altyn uıam – Altaıym» atty shyǵarmashylyq keshke ulǵasty. Saltanatty sharaǵa qatysqan oblys ákiminiń orynbasary Ásem Núsipova jyly lebizin arnap, aqynnyń óńirimizdegi jáne elimizdegi mádenı muranyń damýyna qosyp jatqan úlesi zor ekenin atap ótti. Sondaı-aq, oblys ákimi Danıal Ahmetovtiń quttyqtaýyn jetkizdi.

Shyǵarmashylyq keshti tamashalaýǵa jıylǵan kórermen qaýymnyń nazaryna talantty jerlesteriniń ómirinen syr shertetin beınesıýjet usynyldy. Budan soń Shyǵys Qazaqstandaǵy tanymal ánshiler men vokaldyq toptar Ulyqbek Esdáýlettiń ánderin oryndap, kórermen qoshemetine bólendi. Al mereıtoı ıesiniń ónerdegi inisi Aqberen Elgezek Ulyqbek Esdáýlettiń kóptegen qazaqstandyq qaıratkerlerge úlgi ekenin atap ótti.

– Ol Qazaqstan Jazýshylar odaǵyna basshylyqqa kelmeı turyp-aq, poezııanyń generalyna aınalyp úlgerdi. Poezııada ustaz bolmaıdy deıdi. Alaıda, ol bizdiń baǵyt berer baǵdarshamamyz sııaqty. Qazir biz Ulyqbek Esdáýletteı bolýǵa talpynamyz, - dedi Aqberen Elgezek.

Saltanatty shara barysynda mereıtoı ıesin oblystyq mádenıet, muraǵattar jáne qujattama basqarmasynyń basshysy Azamat Muhamedchınov, oblystyq sport, mádenıet qyzmetkerleri kásipodaǵynyń tóraǵasy Túsiphan Túsipbekova, aıtýly qazaqstandyq aqyn Tynyshtyqbek Ábdikákimuly men elimizdiń mádenıet qaıratkeri Aımuhanbet Beısembekov, kásipker ári metsenat Qaırat Mýsın quttyqtap, aq tilekterin aıtty. Artynsha Shyǵys Qazaqstannyń kásipkerleri birlesip, mereıtoı ıesine temir tulpar mingizdi.