Ulybrıtanııanyń barlyq turǵynyna 650 fýnt sterlıng járdemaqy beriledi

NUR-SULTAN. QazAqparat – Ulybrıtanııada 8 mln astam otbasy 14 shildeden bastap 326 fýnt sterlıng kóleminde járdemaqy alady. Al kúzde 324 fýnt sterlıng somasynda ekinshi tólem beriledi, dep habarlaıdy QazAqparat tilshisi BBC News-ke silteme jasap.

Bul 37 mlrd fýnt sterlıng kólemindegi úkimet paketiniń bir bóligi. Ol elektr energııasyna, azyq-túlikke jáne otynǵa jumsalatyn shyǵyndar kúrt ósken jaǵdaıda halyqtyń eń osal toptaryna kómek kórsetýge baǵyttalǵan.

Eń tómengi kúnkóris mólsherinde eki tólem – barlyǵy 650 fýnt sterlıng Anglııa, Ýels, Shotlandııa jáne Soltústik Irlandııanyń qandaı da bir járdemaqy alatyn barlyq turǵynyna avtomatty túrde aýdarylady.

Sonymen qatar áleýmettik jaǵdaıyna qaramastan Ulybrıtanııadaǵy barlyq otbasy kúzde elektr energııasyn tóleýge kómek retinde 400 fýnt sterlıng, sondaı-aq buryn jarııalanǵan mýnıtsıpaldy salyq jeńildikteri retinde 150 fýnt sterlıng alady.

Budan bólek zeınetkerler úshin 300 fýnt sterlıng jáne múgedekter úshin 150 fýnt sterlıng mólsherinde jeke tólem jasalady, ol 650 fýnt sterlıngke qosymsha tólenedi.

Úkimettiń baǵalaýynsha, tabysy tómen mıllıondaǵan azamatqa bıyl kem degende 1200 fýnt sterlıng kóleminde qoldaý kórsetiledi. Mamyr aıynda Ulybrıtanııa bıligi qazan aıyndaǵy elektr energııasynyń qymbattaýyna baılanysty halyqqa ótemaqy bóletinin jarııalady.