Ulybrıtanııadaǵy qazaq dıasporasy Naýryzdy atap ótti

LONDON. QazAqparat – Ulybrıtanııadaǵy qazaq dıasporasy Naýryz meıramyn toılady. Kóktem merekesin otandastarymyz 2017 jyldan beri atap ótip keledi, dep habarlaıdy QazAqparat menshikti tilshisi.

Merekeleý senbide Londonnan ońtústikke qaraı 70 shaqyrym jerde ornalasqan Ýokıng qalasynda ótti, onda Ulybrıtanııanyń túkpir-túkpirinen qazaq dıasporasynyń ókilderi jınaldy. Bizdiń kóptegen otandasymyz ulttyq naqyshtaǵy kıimder kıdi.

Keń dastarhan jaıylyp, beshbarmaq, palaý, Naýryz kóje, baýyrsaq pen táttiler qoıyldy. Qonaqtar ulttyq oıyn oınap, erekshe merekelik atmosfera ornady.

Kórermender úshin kontserttik baǵdarlama daıyndaldy, oǵan eresekter de, balalar da qatysty. «Naýryz – dýman», «Bıdaı kóje», «Kózimniń qarasy», «Quıryq baýyr» sııaqty zamanaýı jáne halyq ánderi, sondaı-aq «Qara jorǵa» bıi qonaqtardyń kóńilinen erekshe shyqty.

Belgili qazaqstandyq skrıpkashy, halyqaralyq baıqaýlardyń laýreaty Dıana Mahmýd «Aqqý» kúıin oryndady. Ol «Bolashaq» baǵdarlamasy boıynsha Koroldik mýzyka akademııasynyń magıstratýrasynda oqıdy.

«Biz qazaq dıasporasyn Ulybrıtanııanyń túkpir-túkpirinen Naýryz merekesine 2017 jyldan beri jınap kelemiz. Jyl saıyn qatysýshylar sany artyp keledi. Búgin merekede 150-ge jýyq adam kelýi kerek edi, biraq jınalǵandar sany odan kóp boldy. Ókinishke qaraı, ǵımarat shaǵyndaý. Kelesi jyly 300 adamǵa arnalǵan Naýryz merekesin uıymdastyrýdy josparlap otyrmyz», - dedi uıymdastyrýshy Almash Álıeva.