Ulybrıtanııada taǵy bir aýqymdy ereýil ótedi

LONDON. QazAqparat – Sársenbi kúni Ulybrıtanııa astanasyn buryn-sońdy bolmaǵan kólik keptelisi kútip tur. London metropolıteniniń qyzmetkerleri, Anglııa men Ýels muǵalimderiniń ereýiline baılanysty kóptegen mektepter jabylady, dep habarlaıdy QazAqparat tilshisi.

Búkil el boıynsha memlekettik sektor qyzmetkerleri, kommýnaldyq qyzmetkerler jáne Anglııanyń kishi medıtsınalyq qyzmetkerleri jalaqy, zeınetaqy jáne eńbek jaǵdaılaryna narazylyq bildirip, ereýilge shyǵady.

Birden birneshe iri kásipodaq músheleri qatysatyn ereýildiń kúni kezdeısoq tańdalǵan joq, dál sársenbi kúni Ulybrıtanııanyń qarjy mınıstri Djeremı Hant kóktemgi bıýdjetti tanystyrady.

Londonnyń kólik júıesin basqarý kompanııasy metropolıten qyzmetkerleriniń ereýili barlyq jelilerdegi úzilister men kidiristerge ákeledi dep sanaıdy.

Sonymen qatar, Anglııa men Ýels muǵalimderi uzaq ýaqytqa sozylǵan jalaqy daýyna baılanysty sársenbi jáne beısenbi kúnderi ereýilge shyǵýdy josparlap otyr.

Kóptegen mektepter májbúrli túrde jabylady.

Anglııa boıynsha 30-dan astam memlekettik vedomstvolar men kommýnaldyq qyzmetkerler narazylyq aktsııasyn ótkizedi. Olarǵa shekara kúzeti qyzmeti de qosylady.

Sonymen qatar, 170 myńnan astam múshesi bar brıtandyq medıtsınalyq qaýymdastyqtyń kishi dárigerleri dúısenbide bastaǵan úsh kúndik ereýildi jalǵastyrady.

Sársenbi kúngi ereýilge Ulybrıtanııa boıynsha 200 myńnan jarty mıllıonǵa deıin adam qatysýy múmkin.