Ulybrıtanııada maımyl sheshegin juqtyrǵandar sany 2 myńnan asty

LONDON. QazAqparat – Ulybrıtanııa maımyl sheshegi aýrýyn toqtatý úshin 100 000 doza vaktsına satyp aldy. El boıynsha aýrý juqtyrýshylar sany 2130 adamǵa jetti, olardyń kópshiligi – Londonda, dep habarlaıdy QazAqparat ABC News basylymyna silteme jasap.

Brıtandyq densaýlyq saqtaý agenttigi indet taralyp jatqanyn aıtty. Aýrýdy kóbine dástúrli emes jynystyq baǵyttaǵy er adamdar juqtyrǵan.

Tek maımyl sheshegin juqtyrǵan naýqastardy emdeıtin medıtsına qyzmetkerleri jáne aýrýǵa shaldyqqandarmen baılanysta bolǵan adamdarǵa ǵana vaktsına salynatyn.

Ulybrıtanııa bıligi sonymen qatar joǵaryda atalǵan erlerdiń jeke sanatyna da vaktsınatsııany usynyp, ekpe strategııasyn keńeıtti.

Agenttik osy aıda vaktsınanyń alǵashqy qosymsha dozalary keledi, al qalǵany qyrkúıek aıynda jetkiziledi dep málimdedi.

Bavarian Nordic kompanııasy shyǵarǵan vaktsına sheshek aýrýyn emdeýge arnalǵan.

Onyń maımyl sheshegine qarsy tıimdiligi - shamamen 85%.

Buǵan deıin Vashıngtonda maımyl sheshegi órship bara jatqany habarlanǵan bolatyn.