Ulybrıtanııada Qazaqstandaǵy prezıdent saılaýyna daıyndyq júrip jatyr
Astana men London arasyndaǵy ýaqyt aıyrmashylyǵy 6 saǵat. Sondyqtan bul eldegi saılaý Qazaqstanǵa qaraǵanda keshirek bastalyp, keshirek aıaqtalady. Qazir ýchaskede sońǵy daıyndyq jumystary júrgizilip, daýys berýshiler tirkelýde. Buǵan deıingi saılaýlarda jyl saıyn 500-ge jýyq qazaqstandyqtyń tańdaý jasaǵany belgili. Bıyl da otandastarymyzdyń belsendiligi joǵary bolady degen senim bar.
«Birikken Koroldik quramyna Anglııa, Ýels, Shotlandııa jáne Soltústik Irlandııa memleketteri kiretini málim. Osyǵan oraı 20 qarashada ótetin daýys berýge osy elde ýaqytsha júrgen nemese turaqty turatyn Qazaqstan Respýblıkasynyń qoldanystaǵy tólqujaty bar barlyq azamattar kelip, qatysa alady», -deıdi №244 saılaý ýchaskesi komıssııasynyń tóraǵasy Mıraz Ańdabaev.
Daýys berýshiler qatarynda týrıster de kóp bolady dep kútilýde. Óıtkeni saıası naýqan kezinde Tumandy Albıonda saıahattap júrgen otandastarymyz azamattyq boryshtaryna jaýapkershilikpen qarap, saılaý ýchaskesine mindetti túrde at basyn burady. Stýdentter qaýymy da belsendilik tanytady degen boljam bar. Tek «Bolashaq» baǵdarlamasy boıynsha Brıtanııada bilim alyp jatqan jastardyń sany júzden asady.
«Men Lester ýnıversıtetiniń bıznes jáne kóshbasshylyq baǵyty boıynsha oqyp jatyrmyn. Qazirgi tańda biz otanymyzda bolmasaq ta, shetelde júrsek te azamattyq boryshymyzdy óteýge osy jerge kelip, óz daýysymyzdy berýge daıynbyz», - deıdi Lester ýnıversıtetiniń magıstranty Qýanysh Esentaı.
Tańerteńgi saǵat 7-de ashylatyn ýchaske keshki saǵat 8-ge deıin jumys isteıdi. Odan keıin saılaý komıssııasynyń músheleri daýystardy sanaý protsesine kirisedi. Ýchaske jabylǵannan keıin 1-2 saǵattyń kóleminde Londondaǵy daýys berý nátıjeleri belgili bolmaq. Saıası mańyzy bar naýqannyń aldyn ala nátıjeleri erteńinde jarııa etiledi.