Ulybrıtanııada «Kazakhstan at 30: The Awakening Great Steppe» atty kitaptyń tusaýkeseri ótti
Onyń aıasynda elimizdiń táýelsizdik jyldaryndaǵy jetistikteri týraly jazylǵan aǵylshyn tilindegi «Kazakhstan at 30: The Awakening Great Steppe» («Qazaqstannyń 30 jyldyǵy: Jańǵyrǵan Uly Dala») atty jańa kitaptyń tusaýy kesildi.
Kitapta ekonomıkalyq damý, ınvestıtsııalyq ahýaldy jaqsartý, saıası reformalar, bilim berý júıesin transformatsııalaý, halyqaralyq arenadaǵy jetistikter, mádenı murany, týrızmdi damytý sııaqty sońǵy úsh onjyldyqta jetken jetistikterge sholý jasalady. 15 esseden turatyn jınaqtyń avtorlary: bedeldi brıtanııalyq, halyqaralyq jáne qazaqstandyq sarapshylar.
Alǵy sózdi belgili brıtanııalyq tarıhshy, «Jibek joly: Álemniń jańa tarıhy» álemdik bestselleriniń avtory, Oksford ýnıversıtetiniń professory Pıter Frankopan jazǵan. Esse avtorlarynyń qatarynda QR Prezıdentiniń ekonomıkalyq damý máseleleri jónindegi shtattan tys keńesshisi Ser Sýma Chakrabartı, QR Prezıdentiniń kómekshisi Erlan Qarın, AQSh Memlekettik hatshysynyń burynǵy kómekshisi Nısha Bısval, Birikken Koroldiktiń burynǵy Memlekettik Qorǵanys mınıstri Djonatan Aıtken, Ulybrıtanııa Parlamenti Lordtar palatasynyń múshesi jáne Anglııa men Ýelstiń burynǵy Joǵarǵy sýdıasy Lord Garrı Výlf, kanadalyq sáýlet tarıhshysy jáne «Astana: sáýlet, mıf jáne taǵdyr» kitabynyń avtory Frenk Albo bar.
Ulybrıtanııa parlamentiniń depýtaty, Qazaqstanmen yntymaqtastyq jónindegi Jalpypartııalyq parlamenttik toptyń tóraǵasy jáne kitaptaǵy esse avtorlarynyń biri Bob Stıýart quttyqtaý sózinde Qazaqstannyń tarıhı ólshem boıynsha qysqa merzim 30 jyl ishinde zor tabystarǵa qol jetkize alǵanyn atap ótti.
«Táýelsizdik jyldarynda elderińiz óziniń memlekettik shekarasyn bekitip, halyqaralyq arenadaǵy bedelin nyǵaıta aldy. Jańa ekonomıkalyq júıeni, áleýmettik salany damytty, álemdik deńgeıdegi oqý oryndaryn qurdy, sondaı-aq ózine aǵylshyn jalpy quqyǵy qaǵıdattaryn basshylyqqa alǵan quqyqtyq júıeni qalyptastyrdy», – dedi ol.
Qazaqstannyń Ulybrıtanııadaǵy elshisi Erlan Ydyrysov, óz kezeginde, bul biregeı kitap refleksııa ispettes – táýelsizdiktiń alǵashqy 30 jylynyń obektıvti baǵasy, sondaı-aq halyqaralyq jáne qazaqstandyq sarapshylardyń bolashaqqa jańa kózqarasy ekendigin atap ótti.
«Astana» halyqaralyq qarjy ortalyǵy (AHQO) sotynyń tóraǵasy Lord Djonatan Mans AHQO soty men halyqaralyq tórelik ortalyǵyn (HTO) qurýda qol jetkizilgen jetistikteri jáne onyń tıimdi jumysy týraly aıtyp berdi.
«AHQO soty – bul ortalyqtyń ózi úshin de, onyń qyzmetine júginetin adamdar úshin de zań ústemdigi men bıznes-protsesterdiń qaýipsizdigine kepildik berýge arnalǵan ınnovatsııalyq kásiporyn. Bul sottyń ereksheligi – ol Qazaqstannyń ulttyq quqyqtyq júıesinen tolyǵymen táýelsiz. AHQO Eýrazııa júregindegi Brıtan quqyǵynyń araly», - dep atap ótti ol.
Qazaqstandaǵy bilim berý júıesin damytý týraly esseniń avtory Kembrıdj ýnıversıteti Bilim berý ınnovatsııalary departamentiniń dırektory professor Kollın MakLaflın asa joǵary halyqaralyq standarttar deńgeıinde jumys isteıtin Nazarbaev Ýnıversıtetin, sondaı-aq oqytý salasyndaǵy ozyq bilim men tehnologııalar synaqtan ótken eksperımenttik mektepter qurý bastamasye kóregen sheshim dep atap ótti.
«Sońǵy jyldary Qazaqstan uzaq joldy ótkergenine qaramastan, bul protsess áli de jalǵasýda. Osy ýaqyt ishinde sizdiń elińiz oqý baǵdarlamasyn, baǵalaý júıesin, pedagogıkany, muǵalimderdiń jumys jaǵdaıyn, sonyń ishinde jalaqyny ózgertti. Qazaqstan da halyqaralyq deńgeıde moıyndaldy – qazaqstandyq baǵalaý júıesi alǵash ret álemdik deńgeıde tanyldy. Bul keremet jetistikter. Sońǵy 4-5 jyl ishinde bul reformalar pılottyq satydan ótip, búkil el boıynsha engizilip jatyr. Bul odan da kúrdeli jaýapkershilik júkteıdi», – dep túıindedi ol.
Basylymnyń redaktory, jýrnalıst jáne jazýshy Nık Fıldıng kitaptaǵy esselerdiń avtorlarynyń sarqylmas yntasy men Qazaqstan týraly bilim tereńdigine tánti bolǵanyn atap ótip, tyńdaýshylardy kitapty oqýǵa jáne Uly Dala eline saıahattaýǵa shaqyrdy.
Qazaqstan Táýelsizdiginiń 30 jyldyǵyna oraı ótken konferentsııa Brıtan Parlamenti jınalystar ótkizetin Vestmınster saraıynyń tarıhı zaldarynyń biri – «Strangers' Dining Room» bólmesinde ótti. Іs-sharaǵa 100-den astam qonaq, onyń ishinde belgili parlamentııler, Birikken Koroldiktiń saıası, akademııalyq jáne mádenı toptarynyń ókilderi, jýrnalıster men sheteldik dıplomattar qatysty.