Ulybrıtanııada ereýilge baılanysty poıyzdardyń 80%-y toqtatyldy

LONDON. QazAqparat – Beısenbi kúni Ulybrıtanııada poıyzdardyń 80%-y toqtatyldy. Koroldik temirjoldarynyń kóp bóligine, sonyń ishinde Londondaǵy barlyq iri vokzal stantsııalaryna qyzmet kórsetetin kompanııa kásipodaqtary ereýilge shyqty, dep habarlaıdy QazAqparat euronews-ke silteme jasap.

Temirjolshylardyń basty talaby – jalaqyny kóterý. Olardyń aıtýynsha, eńbekaqylary energetıkalyq daǵdarys pen ınflıatsııanyń kúrt ósýine deıin de jetkiliksiz bolǵan.

Beısenbi kúni ondaǵan myń jolaýshy dittegen jerine jete almaı qalǵan nemese keshigip bardy.

Brıtandyqtardan kelesi aptaǵa deıin shuǵyl qajettilik bolmasa, saparǵa shyǵýdy josparlamaý suraldy.

Temirjolshylardyń bul narazylyǵy el tarıhynda keıingi otyz jyl ishinde bolyp otyrǵan eń aýqymdy ereýil ekeni aıtylyp jatyr.

Kelesi aktsııa senbige josparlanǵan, al búgin London metrosynyń qyzmetkerleri jumysqa shyqpaıdy.

Foto: Frank Augstein/The Associated Press