Ulybrıtanııada Elbasy týraly «Ýaqyt tańdaýy» fılmi kórsetildi

NUR-SULTAN. QazAqparat - Brıtanııa kıno óneri jáne telearna akademııasynda (BAFTA, London qalasy) Radık Kýdoıarovtyń «Ýaqyt tańdaýy» derekti fılminiń aǵylshyn tilindegi álemdik premerasy ótti. Kartına Qazaqstan Respýblıkasynyń Tuńǵysh Prezıdenti - Elbasy Nursultan Nazarbaevqa arnalǵan, dep habarlaıdy QazAqparat.

Іs-sharany QR Tuńǵysh Prezıdenti qory Qazaqstannyń Londondaǵy elshiligi men Brıtan-Qazaqstan qoǵamynyń qoldaýymen uıymdastyrdy.

BAFTA - álem kınematografııasynyń bedeldi ortalyqtarynyń biri, kınoóner salasynda jetken jetistikteri úshin jyl saıyn óner ıelerine beriletin syılyq. Ol «Altyn globýs» jáne «Oskar» syılyqtarymen para-par.

QR Tuńǵysh Prezıdenti-Elbasy qorynan málim etkendeı, sharaǵa qurmetti qonaq retinde brıtandyq resmı tulǵalar, lordtar jáne qaýymdar palatasynyń músheleri, syrtqy saıasat jáne qaýipsizdik salasyndaǵy jetekshi halyqaralyq sarapshylar, shet elderdiń elshileri men dıplomattar qatysty.

Kınokórsetilimge Oksford, Kembrıdj zertteýshilerinen bólek, Vena men Nıý-Iorkten saıasatkerler keldi. Qonaqtar aldynda Qazaqstan Respýblıkasynyń Birikken Koroldiktegi Elshisi Erlan Ydyrysov, Brıtan-Qazaqstan qoǵamynyń tóraǵasy Rýpert Gýdman, Qazaqstanmen yntymaqtastyq jónindegi Jalpypartııalyq parlament tobynyń tóraǵasy, Qaýymdar palatasynyń múshesi Bob Stıýart jáne rejısser Radık Kýdoıarov sóz sóıledi.

«Ýaqyt tańdaýy» derekti fılmi Tuńǵysh Prezıdent qorynyń tapsyrysymen 2018 jyly Qazaqstan astanasynyń 20 jyldyq mereıtoıyna oraı túsirilgen.

Eki serıaly fılmniń negizgi sıýjeti Nursultan Nazarbaevtyń jańa qazaqstandyq memlekettikliktiń qalyptasýyndaǵy erekshe tarıhı mıssııasyna arnalǵan. Sondaı-aq táýelsizdiktiń alǵashqy jyldaryndaǵy syn-qaterler, Qazaqstannyń qalyptasqan naryqtyq ekonomıkasy men úzdik ınvestıtsııalyq klımaty, eldiń jańa astanasynyń qurylysy baıandalady.

Álemniń alpaýyt elderiniń kóshbasshylary men saıası qaıratkerleri Qazaqstan men onyń elordasy, sondaı-aq Elbasynyń kemeńger sheshimderi týraly pikirler bildirgen.