Ulybrıtanııada ekonomıkalyq quldyraýdy toqtatý úshin salyq kólemin ósirý usynyldy

LONDON. QazAqparat – Ulybrıtanııanyń qarjy mınıstri Djeremı Hant ekonomıkalyq ósimniń quldyraýy men ınflıatsııanyń údeýine baılanysty salyq kólemin ulǵaıtýdy usyndy, dep habarlaıdy QazAqparat tilshisi.

«Jalpy, bıylǵy jyly ekonomıkalyq ósim 4,2 paıyz deńgeıinde boljanýda. Sonda JІÓ 2023 jyly 1,4%-ǵa tómendeıdi, al aldaǵy úsh jylda ol 1,3%-ǵa, 2,6%-ǵa jáne 2,7%-ǵa ósedi», – dedi Djeremı Hant el Parlamentinde daǵdarysty eńserý josparyn tanystyra otyryp.

Brıtan mınıstrler kabınetiniń esepteýleri boıynsha, Ulybrıtanııadaǵy ınflıatsııa bıyl 9,1%-dy quraıdy jáne 2023 jyly 7,4%-ǵa deıin baıaýlaıdy. Baǵanyń ósýine negizgi faktorlar energııa tarıfteriniń ósýi men azyq-túlik taýarlarynyń qymbattaýy boldy.

Usynylǵan sharalarǵa, basqalarmen qatar, joǵarǵy 45% tabys salyǵynyń mólsherlemesi úshin jyldyq jalaqy shegin aǵymdaǵy 150 myń fýnttan 125 myń fýntqa deıin tómendetý kiredi.

Taǵy bir jańalyq – 2025 jyldyń sáýirinen bastap elektromobıl ıelerine kólik salyǵy salynady. Buryn mundaı tólem túrin ishten janatyn qozǵaltqyshy bar kólik ıeleri ǵana tóleıtin.

Sonymen qatar Hant úkimettiń aldaǵy bes jylda 30 mlrd fýnt sterlıngke deıin únemdeýge múmkindik beretin memlekettik shyǵyndardyń ósýin qalypty etý týraly sheshimin jarııalady.

Foto: Andy Rain/EPA