Ulybrıtanııada alǵash ret azııalyq azamat premer-mınıstr boldy

LONDON. QazAqparat - Ulybrıtanııanyń úkimet basshysy qyzmetine Rıshı Sýnak saılandy. Konservatorlar partııasynyń kóshbasshysy retinde qatysqan birinshi saılaýda jeńilgen ol arada jeti apta ótkende kózdegen maqsatyna jetti. Kúreste qalǵan jalǵyz qarsylasy jarystan shyǵatynyn jarııalaǵan soń Rıshı Sýnak 100 partııalyq daýysy bar jalǵyz qatysýshy jáne sáıkesinshe jeńimpaz boldy, dep habarlaıdy QazAqparat BBC agenttigine silteme jasap.

Osylaısha Sýnak resmı protsedýra aıaqtalǵannan keıin tarıhtaǵy alǵashqy azııalyq brıtan premer-mınıstri bolady.

Tamyz aıynda burynǵy qarjy mınıstri Rıshı Sýnak premer-mınıstrdiń ornyna talasqany esimizde.

Alaıda, ol sol kezde konservatıvti partııa músheleri oǵan senim artpady, olar Lız Trassty jón kórdi jáne belgili bolǵandaı, olar qatelesti.

Eldegi eń joǵary laýazym úshin ekinshi márte baq synaǵanda joly boldy, ásirese Djonson óziniń kandıdatýrasyn alyp tastaǵannan keıin. Jalpy bul joly Sýnaktyń qarsylasy salystyrmaly túrde onsha tanymal emes Pennı Mordont edi.

Jazǵy saılaý naýqany kezinde Sýnak negizinen Ulybrıtanııa ekonomıkasyna nazar aýdaryp, ony daǵdarystan shyǵarý josparyn usyndy.

Sodan keıin Sýnak BBC-ge bergen suhbatynda «jalǵan ýádemen jeńgennen góri kóshbasshylyq jarysta jeńilip qalǵany jaqsy ekenin» aıtqan.

Rıshı Sýnak ekonomıka úshin óte qıyn sátte premer-mınıstr qyzmetin atqarǵaly jatyr.

Eske sala keteıik, Sýnak 2020 jyldyń aqpanynda qarjy mınıstri bolǵan jáne birneshe aptadan keıin bastalǵan pandemııa men uzaqqa sozylǵan karantın jaǵdaıynda Ulybrıtanııa ekonomıkasyn basqardy.

2020 jyldyń kókteminde ol elge pandemııadan aman qalý úshin qajet nárseniń bárin jasaýǵa ýáde berdi jáne jalpy somasy 350 mlrd fýnt-sterlıngti azamattar men bıznesti qoldaýǵa jumsaıtynyn aıtty. Onyń jeke reıtıngi kúrt kóterildi.

Alaıda Ulybrıtanııa ekonomıkasy áli de turaqtanǵan joq. Sýnaktyń ózine 2020 jyldyń maýsymynda polıtsııa Daýnıng-strıttegi shekteý talabyn buzǵany úshin aıyppul saldy.

1980 jyly Saýtgemptonta týǵan, turǵylyqty jeri - London jáne Iorkshır

Vınchester kolledjinde, Oksford jáne Stenford ýnıversıtetinde bilim alǵan.

Kásipker Aqshata Mertıge úılengen, eki qyzy bar.

Úndistannan shyqqan Sýnaktyń ata-anasy Ulybrıtanııaǵa Shyǵys Afrıkadan kelgen.

Ákesi terapevt dáriger bolǵan, al anasy jeke dárihanany basqarǵan.

Ol elıtalyq jeke mektepte oqydy jáne jazda Saýtgempton meıramhanasynda daıashy bolyp jumys istedi.

Sodan keıin Sýnak fılosofııany, saıasatty jáne ekonomıkany zertteý úshin Oksfordqa oqýǵa túsken.

Stenford ýnıversıtetinde MBA baǵdarlamasynda oqyp júrgende úndi mıllıarderi jáne Infosys kompanııasynyń negizin qalaýshy Naraıana Mertıdiń qyzy, bolashaq áıeli Aqshata Mertımen tanysqan.

Erli-zaıyptylardyń eki qyzy bar.

2001 jyldan 2004 jylǵa deıin Sýnak Goldman Sachs-te analıtık bolyp jumys istedi, sodan keıin eki hedj-qordyń seriktesi boldy.

Ol Parlamenttegi eń baı depýtattardyń biri sanalady, biraq asyp-tasqan dáýleti jaıly kópshilik aldynda túsinikteme bergen emes.

Sýnaktyń baılyǵy jáne onyń bedeldi jeke mektepte alǵan bilimi de jıi talqylanatyn boldy.

Sky News telearnasynyń júrgizýshisi Keı Berlı odan «premer-mınıstr bolý úshin tym baı» degen málimdemelerdi qalaı qabyldaıtynyn surady. Jaýap retinde Sýnak ınflıatsııa barlyq azamattarǵa áser etetinin jáne Lız Trasstan aıyrmashylyǵy, onyń baǵdarlamasy eń aldymen kedeılerge kómek kórsetetinin eske saldy.

2020 jyldyń aqpanynda ol qarjy mınıstri bolyp taǵaıyndaldy jáne bastapqyda Djonsondy belsendi qoldady, biraq keıin óziniń ekonomıkaǵa degen kózqarasy premer-mınıstrdiń kózqarasynan túbegeıli basqasha ekenin aıtyp, otstavkaǵa ketti.