Ulybrıtanııa vandalızmge jol bergen ekobelsendilerge qarsy zań qabyldaıdy

LONDON. QazAqparat – Brıtan ishki ister mınıstri Sýella Braverman sońǵy kezderi radıkaldy klımat belsendileri uıymdastyrǵan narazylyq aktsııalaryna qarsy josparyn jarııalady, dep habarlaıdy QazAqparat VVS-ge silteme jasap.

Onyń aıtýynsha, qoǵamdyq tártip týraly jańa zań sherýshilerge adamdardy kepilde ustaýǵa jol bermeıdi.

Eger ol qabyldansa, narazylyq negizgi ınfraqurylymnyń jumysyn aıtarlyqtaı buzǵan jaǵdaıda bılik ony toqtata alady.

Buǵan jaýap retinde belsendiler jańa zańnamadan qoryqpaıtynyn aıtty.

Klımattyń ózgerýine qarsy kúresýshilerdiń radıkaldy toptary, sonyń ishinde Just Stop Oil jáne Extinction Rebellion sońǵy aılarda ártúrli narazylyqtar men sherýler ótkizgen.

Olar adamdardyń jumysqa jetýine kedergi keltirip, Londonnyń ortalyǵyndaǵy kólik qozǵalysyn buzǵan.

Eldiń ishki ister mınıstrliginiń málimeti boıynsha, qazan aıynyń basynan bastap Londonda Just Stop Oil tobynan 350-den astam sherýshi qamaýǵa alyndy, olar munaı men gaz óndirýge jańa lıtsenzııa men ruqsat berýdi toqtatýdy talap etken.

Eger parlament jańa zańdy qabyldasa, bılik ókilderi «qoǵamdyq qaýipsizdikke eleýli kedergi keltiretin nemese keri áser etetin» narazylyq aktsııalaryna tyıym salýdy talap etip, sotqa júgine alady.

Zań jobasy kelesi aptada qaýymdar palatasynda usynylady.

Foto: bbc.com