Ulybrıtanııa bıligi qymbattaǵan energııa úshin ótemaqy beredi

BRıÝSSELЬ. QazAqparat – Ulybrıtanııa bıligi elektr energııasy úshin qordalanǵan tólemderdi jabýǵa ótemaqy beredi, dep habarlaıdy QazAqparat menshikti tilshisi.

Beısenbi kúni Ulybrıtanııa qazynashylyǵynyń kantsleri Rıshı Sýnak 15 mıllıard fýnt sterlıng kólemindegi qarjylyq qoldaý paketin jarııalady.

Buǵan deıin brıtandyq «Ofgem» energetıka operatory bıylǵy jyldyń qazan aıynda úı sharýashylyqtary úshin elektr qýatynyń ortasha tólemi 800 fýnt sterlıngke artyp, jylyna shamamen 2 800 fýnt sterlıngti (shamamen 1,5 mln teńge) quraıtynyn málimdegen bolatyn. Bul rette Ulybrıtanııadaǵy ınflıatsııa deńgeıi 9% jetti. Bul – sońǵy 40 jyldaǵy eń joǵary kórsetkish.

Úkimettiń jańa sharalaryna sáıkes, 2022 jyldyń qazan aıynda eldegi barlyq úı sharýashylyqtaryna elektr energııasy úshin 400 fýnt sterlıng mólsherinde jeńildik jasalady. Al muqtaj adamdarǵa qosymsha kómek kórsetiledi. Atalǵan qarajat ishinara gaz jáne munaı kompanııalarynyń paıdasyna salynatyn 25 paıyzdyq salyq esebinen jınaldy, olar qazir elektr jaryǵynyń qymbattaýynan ústeme paıda kórip jatyr.

Úkimet múshesi eń tómengi kúnkóris deńgeıin qoldaý sharalaryn «ýaqytsha» dep atady. Alaıda, Qarjylyq zertteýler ınstıtýty taldaý ortalyǵynyń málimetinshe, energııa baǵasynyń qymbattaýy aıasynda Ulybrıtanııa úkimeti kem degende taǵy bir jyl halyqqa áleýmettik kómek kórsetýge májbúr bolady. Al energııa tarıfi 2023 jylǵa deıin taǵy qymbattaıdy.

Tabysy az halyqty zertteýge mamandandyrylǵan Resolution Foundation analıtıkalyq ortalyǵy qazirgi sharalardy «úlken jáne maqsatty paket» dep sıpattady. Ol 2022-2023 jyldardaǵy úı sharýashylyqtary úshin energııa shyǵyndarynyń 82% óteıdi.