Ulybrıtanııa Almatyda tsıfrlyq jobalardy júzege asyrýǵa nıetti

ALMATY. QazAqparat – Almaty qalasy ákiminiń orynbasary Erjan Babaqumarov Qazaqstan Respýblıkasyndaǵy Ulybrıtanııa Elshiligi ókildigi basshysynyń orynbasary Dj. Leıfıldpen kezdesti, dep habarlaıdy QazAqparat tilshisi.

Kezdesý barysynda kreatıvti ındýstrııany damytý, sonymen qatar bilim, densaýlyq saqtaý salalarynda birlesken jobalardy júzege asyrý boıynsha yntymaqtastyqty damytý máseleleri talqylandy.

Halyqtyń jaıly ómir súrýi úshin qala keńistigin odan ári abattandyrýdy basty maqsat etken «Almaty-2050» strategııasyna, megapolısti «sheti joq qala» qaǵıdaty boıynsha damytýǵa jete nazar aýdaryldy.

Atap aıtqanda, Almatyny mádenı kreatıvti qala, ınnovatsııa men «jasyl bilimniń» jańa ındýstrııasynyń ortalyǵy retinde qalyptastyrý tetikteri qaraldy. Ulybrıtanııa Elshiligi tsıfrlyq mádenıet salasynda birlesken jobalardy júzege asyrýǵa qyzyǵýshylyqtaryn bildirdi.

Taraptar birlesken yntymaqtastyqtyń mańyzyn jáne keń aýqymdy máseleler boıynsha ózara baılanysty odan ári tereńdetýge yntaly ekendikterin atap ótti.