Uly Jeńistiń 74 jyldyǵy: Túrkistanda «Er esimi - el esinde» atty shara ótti
Oblys ákimi Ómirzaq Shókeev Uly Otan soǵysyna qatysqan batyrlardy Uly jeńistiń 74 jyldyǵymen quttyqtady.
«Batyrlarymyz qan maıdanda erlik jasap júrgen sátte elde qalǵan otandastarymyz da aıanyp qalmady. Buǵanasy qatpaǵan jas baladan bastap, eńkeıgen kárige deıin tylda eńbek etip, maıdangerlerdi azyq-túlikpen, qarýmen, kıimmen qamtamasyz etti. Tipti, qyzdarymyz da maıdanǵa attanyp, ardaqty analarymyz aýyr jumystardy atqardy. QR Tuńǵysh Prezıdenti Nursultan Nazarbaev «Bizdiń ardagerlerge degen qurmetimiz olardyń erliginen kem túspeýge tıis» dep aıtqan bolatyn. Endeshe, soǵys jáne tyl ardagerlerin, Túrkistan oblysynyń barsha turǵyndaryn 9 mamyr - Jeńis kúni merekesimen quttyqtaımyn! Ardagerlerimiz aman, jastarymyz otanshyl bolsyn! Otbasylaryńyzǵa amandyq, jumystaryńyzǵa tabys tileımin», - dedi oblys ákimi Ó.Estaıuly.
Merekege jınalǵan kópshilik nazaryna «Jeńis alaýy» teatrlandyrylǵan sazdy-horegrafııalyq kompozıtsııasy usynyldy. Sonymen qatar, kontserttik baǵdarlama ótip, «Qazaq eline myń alǵys!» teatrlandyrylǵan sazdy kompozıtsııasy oryndaldy. Budan basqa, sharada ardaqty ardagerler maıdanda erlikpen qaza tapqandardyń rýhyna taǵzym jasap, «Dańq» memorıalyna gúl shoqtaryn qoıý rásimi ótti.
Aıta keteıik, qazaq jerinen Uly Otan soǵysyna bir mıllıonnan astam erjúrek jaýyngerler qan maıdanǵa attanǵan. Jalpy oblystan Uly Otan soǵysyna 140 myńnan astam azamat attanyp, onyń 70 myńy elge oraldy. Onyń ishinde 51-i Keńes Odaǵynyń batyrlary, 1-i Halyq qaharmany jáne 8-i úshinshi dárejeli «Dańq» ordeni kavalerleri ataǵyn alǵan. Qazirgi tańda oblysta 63 Uly Otan soǵysy ardagerleri men 9445 tyl eńbekkerlerine jáne 521 Uly Otan soǵysy ardagerlerine teńestirilgen azamattar bar.