Uly Jeńistiń 65 jyldyǵyna arnalǵan Máskeýdegi paradqa elimizden 32 ardager barady
Bul týraly búgin Astanada ótken brıfıngte QR Qorǵanys mınıstrliginiń baspasóz hatshysy Qaısar Muǵalov málim etti, dep habarlaıdy QazAqparat.
Onyń sózine qaraǵanda, Reseı astanasyndaǵy paradqa QR Qarýly Kúshteriniń 90 áskerı qyzmetkeri qatysady.
«Atap aıtqanda Máskeýdegi Jeńis paradyna Qazaqstannyń ár oblysynan eki adamnan eseptegende 32 ardager baratyn bolady. Sonymen birge dárigerler men basqa da erip baratyn azamattar bar»,-dedi baspasóz hatshysy.
Munymen qosa Q. Maǵaýov elimizdiń 200 áskerı qyzmetshileri Reseıdiń Tver oblysynda 2005 jyldan beri izdestirý toptary tapqan 140 qazaqstandyq maıdangerlerdiń súıegin qaıta jerleý rásimine qatysatynyn aıtty. Atap aıtqanda, osy oblysta qyrkúıekte 100 jáne 101 brıgadanyń quramyndaǵy qazaqstandyq jaýyngerlerge arnalǵan eskertkish ashylatyn bolady. Bul sharalarǵa 70 mıllıon teńge bólingen jáne eskertkishtiń nobaıyn reseılik jaǵy daıarlaǵan. Uly Jeńistiń mereıtoıy qarsańynda estelik estafetasy sharasy aıasynda elimizden baratyn delegatsııa maıdan bolǵan jerlerde, týysqandary men dostary jerlengen óńirlerde bolady.