ULY OTAN SOǴYSYNYŃ BATYRLARY: Jaý dzotyn keýdesimen japqan - Boran Nysanbaev
Boran Nysanbaev - 1918 jyly Atyraý oblysy Inder aýdany Qańbaqty aýylynda dúnıege kelgen. Al 1943 jyly 2 aqpanda Reseı Federatsııasynyń Orel oblysynda qaza tapty. Ekinshi dúnıejúzilik soǵysqa qatysýshy, mınometshiler raschetiniń komandıri. 1942 jyly ásker qataryna shaqyrylyp, 137-atqyshtar dıvızııasynyń 771-polki mınometshiler raschetiniń komandıri boldy. 1943 jyly Reseıdiń Orel oblysy Leskı derevnıasy janyndaǵy urys kezinde jaý dzotyn keýdesimen jaýyp, ózi erlikpen qaza tapty. Osy erligi úshin Nysanbaevqa 1943 jyly 23 qyrkúıek kúni KSRO Joǵarǵy Keńesi Tóralqasynyń Jarlyǵymen Keńes Odaǵynyń Batyry ataǵy berildi. Orel oblysy Pokrov aýdany Droskovo derevnıasynda jerlengen. Lenın, 1-dárejeli Otan soǵysy ordenderimen marapattaldy. Nysanbaev qaza bolǵan jerge eskertkish qoıyldy jáne Droskovo orta mektebine esimi berilip, bıýst ornatyldy.
Týǵan aýylyndaǵy mektep, bir kóshe Nysanbaev esimimen atalady. Onyń erligi «Eto byl v Leskı» dep atalatyn pesaǵa arqaý bolyp, batyrdy eske alýǵa arnalǵan voleıbol týrnıri jyl saıyn ótkizilip turady. Jazýshy, aqyn Nábıden Ábýtálıevtiń «Boran Nysanbaev» ocherkteri atty kitaby jaryq kórgen.