ULY OTAN SOǴYSYNYŃ BATYRLARY: Pavel Sadomskov

ASTANA. QazAqparat - Uly Jeńistiń 70 jyldyǵy qarsańynda QazAqparat HAA surapyl soǵys jyldarynda óz Otanyn fashıstik basqynshylardan aman alyp qalǵan birtýar batyrlar týraly materıaldar jarııalaıdy. Esimi tarıhta máńgi qalatyn qaharmandarymyzdyń biri - Pavel Sadomskov.

Keńes Odaǵynyń Batyry Pavel Stepanovıch Sadomskov burynǵy Prıýral aýdany ortalyǵy Darııan aýylynda (qazir Zelenovqa qaraıdy) 1923 jyly 4 jeltoqsanda dúnıege kelgen.

1939 jyly segizjyldyq mektepti bitirgennen keıin kolhozda traktorshy bolyp eńbek etken.

1942 jyldyń qyrkúıeginde áskerge alynǵan. 1943 jyldyń aqpanyna deıin Odessa jaıaý áskerler ýchılışesinde oqıdy, ony úzdik bitirgennen keıin maıdanǵa attanady.

Ortalyq maıdanda 60-armııa 226-atqyshtar dıvızııasy 987-polk quramynda barlaýshy retinde urystarǵa qatysady. 1943 jyly 21 qyrkúıekte Kıev oblysy Vyshgorod aýdany Gırevka selosy úshin shaıqasta P.Sadomskov qysyltaıań sátte jaý pýlemetin qolǵa túsirip, oq jaýdyryp, joldastaryna kómekke keledi. Osy urys kezinde ol baǵaly derekterdi qolǵa túsiredi. Taǵy bir aıqas kezinde Pavel Sadomskov qaza bolǵan bólimshe komandırin aýystyryp, komandovanıe alǵa qoıǵan tapsyrmany múltiksiz oryndaýdy qamtamasyz etedi.

Dnepr ózeninen ótý kezindegi batyrlyǵy men tap​qyrlyǵy úshin P.Sadomskovqa 1943 jyly 17 qazanda Keńes Odaǵynyń Batyry ataǵy berildi.

1945 jyly kishi leıtenanttar kýrsyn bitirip, ofıtser atandy.

Soǵystan keıin Kýıbyshev (qazirgi Samara) qa​lasyndaǵy aerodrom jabdyqtary zaýytynda jumys istedi. 1998 jyly 28 tamyzda qaıtys bolyp, Samara qalalyq beıitinde jerlendi.

Lenın, Otan soǵysy ordenderimen mara​pattalǵan.

Darııan aýylynyń qurmetti azamaty bolǵan.