«Uly Otan soǵysyn joqqa shyǵarýǵa eshkimniń moraldyq quqy joq!» - BAQ-qa sholý
***
Qazaqstan áıelderiniń zeınetkerlik jasyn kóterý máselesi birazdan beri qoǵamdaǵy qyzý áńgimege tamyzyq bolýda. Zeınetaqy júıesin jańǵyrtý - Elbasynyń ótken jylǵy «Áleýmettik-ekonomıkalyq jańǵyrtý - Qazaqstan damýynyń basty baǵyty» atty Joldaýynda jáne Úkimettiń 2013 jylǵy 23 qańtardaǵy keńeıtilgen otyrysynda bergen tapsyrmalaryn oryndaý maqsatynda júzege asyrylýda. Osyǵan oraı, Eńbek jáne halyqty áleýmettik qorǵaý mınıstrligi «Zeınetaqy júıesin jańǵyrtý» týraly zań jobasyn jasap shyqty. Osy joba negizinde zeınetkerler jasyn birizdendirý isi qolǵa alynyp, Úkimet pen Májilis depýtattary jobany maquldap, Eńbek jáne halyqty áleýmettik qorǵaý mınıstrligi men Úkimet músheleri halyqqa jańa jobany túsindirý isimen aınalysyp ketti. «Egemen Qazaqstan» gazetiniń jazýynsha, halyqpen júzdesý kezinde 50 jáne odan da joǵary jastaǵy azamattardy jumyspen qamtý máselesi kóterilýde. ıAǵnı zeınetkerlik jasyn birizdendirý jónindegi arnaıy komıssııaǵa kelip túsken shaǵymdardyń denin egde jastaǵy qazaqstandyqtar quraǵan. Statıstıka agenttiginiń málimetteri boıynsha, elimizde jasy 55-ten asqan jalpy ekonomıkalyq belsendi halyqtyń úlesi bar-joǵy 6,3%-dy quraıdy. Demek, osy jastaǵy azamattardyń qoǵamdyq ómirge aralasýy olardyń jasy ulǵaıǵan saıyn azaıa bermek. Sol sebepti, osy jas sanatyndaǵy azamattardyń ómirlik deńgeıin arttyrý, olarǵa jetkilikti zeınetaqy jarnasyn jınaqtaýǵa jáne jumyssyzdyqtyń jalpy deńgeıin tómendetý úshin Eńbek jáne halyqty áleýmettik qorǵaý mınıstrligi 50 jastan asqan azamattardy (bastama 50+) jumyspen qamtýdyń keshendi josparyn jasady. Bul týraly «50+ bastamasy nemese elý jastan asqandar jumyspen qalaı qamtylady?» atty maqalada jazylǵan.
Osy basylymnyń jazýynsha, Qostanaıǵa eki kúndik saparmen Kanadanyń, Japonııanyń, Úndistannyń, Ońtústik Afrıka Respýblıkasynyń, Indonezııanyń, Iraktyń, Vatıkannyń Qazaqstandaǵy elshileri men Koreıa elshisiniń orynbasary, Qytaı Halyq Respýblıkasy elshisiniń keńesshisi jáne hatshysy, Oman Sultandyǵy elshisiniń hatshysy, Belgııa elshiligi saýda-ekonomıkalyq bóliminiń basshysy, Ispanııa Koroldigi elshiligindegi osyndaı bólimniń ókili keldi. «Eldestirmek - elshiden» degendeı, olardyń barlyǵy da Qostanaı oblysymen tanysýdy maqsat tutty.
«Elshilerge oblysty tanystyrýdaǵy basty maqsat - óńirdiń ınvestıtsııalyq qaýqaryn tanytý. Múmkin osy elderdiń birimen ekonomıkalyq múddemiz toǵysyp qalar», - dedi oblys ákiminiń orynbasary Murat Dáribaev. Mundaı sharany ótkizýge oblys ákimdigi muryndyq bolǵan. Bul materıal «12 eldiń dıplomaty - Qostanaıda» degen taqyryppen berilgen.
***
«Nur Astana» basylymynda «Jekemenshik jerler kimdiki?» degen maqala kópshilik nazaryna usynylyp otyr. «...Amal qansha, osynsha jerden qarapaıym jurttyń on sotyq úlesin alýy qııamet-qaıymǵa aınaldy. Búginde resmı derek kózderine qaraǵanda, tegin jer telimin alý úshin 1,3 mıllıonǵa jýyq aryz túsken eken. Jáne munyń 83 paıyzy Astana men Almaty turǵyndarynyń ótinishteri. Quzyrly oryndar osynsha jerdiń ınjenerlik jelilerin salý úshin keminde 30-40 jyl ýaqyt ketetinin eseptep qoıypty. Olardyń oıynsha, jappaı jer berý túbi áleýmettik shıelenisterge alyp keletin kórinedi»,-dep jazady gazet. Bul jaıynda «Jekemenshik jerler kimdiki?» atty maqalada basylǵan.
«Dúnıe júzin dúrliktirgen Bostondaǵy jarylystyń ushqyny bizdiń eldi de sharpyǵany belgili. Qazirgi aǵaıyndy Tsarnaevtardan keıingi esimi eń kóp atalatyn ekeý - Dıas Qadyrbaev pen Azamat Tájaıaqov. Ańdaýsyzda ot basqan stýdentterdiń taǵdyrynan keıin Senat depýtattary saqtyq sharalaryna kóbirek kóńil bólýdi usynyp otyr», -delingen «Nur Astana» gazetindegi «Senator saqtyqqa alańdaýly» atty maqalada. Ǵanı Qasymovtyń aıtýynsha, Qazaqstan lańkestikke tosqaýyl qoıý úshin jańa keshendi shalalardy qolǵa alýy tıis. Atap aıtqanda, elimizge keletin sheteldik týrısterdiń shekaradan ótý tártibin kúsheıtý kerek.
***
«Jas Alash» basylymynyń sońǵy nómirinde «Uly Otan soǵysyn joqqa shyǵarýǵa eshkimniń moraldyq quqy joq!» degen maqala berilgen. Búginde Uly Otan soǵysyn joqqa shyǵarýshylar kóp. Tipti «bul eshkimge qajeti joq soǵys» dep jatady. «Nemister bizdi jaýlap alsa, ushpaqqa shyǵarar edi» deıtinder joq emes. Ókinishtisi, osyndaı taqylettes sózderdi aǵa býynnyń aýzynan estigen jas urpaq keshegi tarıhyn umyta bastady. «Atalarymyzdyń soǵysta kórgen qıynshylyqtaryn, bizdiń baqytty ǵumyr keshýimiz úshin jaý oǵynyń astynda qalyp, sheıit bolǵanyn esten shyǵaryp alǵandaımyz»,-dep jazady maqala avtory.