Uly Otan soǵysy jyldarynda Qazaqstannan qan maıdanǵa 5118 qyz-kelinshek attandy

ASTANA. QazAqparat - Qazaq qyzdary Uly Otan soǵysynda erliktiń eren bıiginen kórinip, elimizdi dańqqa bóledi. Bul týraly búgin elordadaǵy Álııa Moldaǵulovanyń memorıaldy keshenine gúl shoqtaryn qoıý rásiminde QR Bas prokýratýrasy Quqyqtyq statıstıka jáne arnaıy esepke alý jónindegi komıtetiniń tóraıymy Sáýle Aıtbaeva aıtty.

«Qazaq qyzdary Otan qorǵaý jolynda eshkimnen de, eshteńeden de qalys bolǵan emes. Olar mergen de, ushqysh ta, pýlemetshi de, tipti partızan da boldy jáne qaı jerde júrse de erliktiń eren bıiginen kórinip, elimizdi dańqqa bóledi. Olar soldattyń kerzi etigin, shınelin kıip, sonaý Berlınge deıin bardy. Ataǵy búkil elimizge, qala berdi álemge málim Álııa, Mánshúk, Hıýaz sııaqty batyr qyzdarymyzdyń erligin qansha aıtsaq ta artyq bolmasy anyq», - dedi S.Aıtbaeva.

Sonymen qatar ol qatysýshylardyń nazaryn Álııa Moldaǵulovanyń Uly Otan soǵysyndaǵy erligin pash etetin bir oqıǵaǵa aýdardy.

«Jalpy qazirgi derekter boıynsha Qazaqstannan maıdanǵa 5118 qyz-kelinshek attanǵan. Maıdandaǵy dárigerlerdiń 41 paıyzy, feldsherlerdiń 43 paıyzy, medbıkelerdiń 100 paıyzy áıelder bolǵan. Sol bir alasapyran kezeńde aýyrtpashylyqtyń aldyńǵy shebinde analarymyz júrdi desek artyq aıtqandyq emes. Maıdanda tógilgen erlerimizdiń qany men tylda tamshylaǵan eńbekkerlerimizdiń mańdaı teri eshqashan umytylmaıdy», - dedi komıtet tóraıymy.